CMCLN Bobonaru hahú simu fali reklamasaun husi kombatente sira
BOBONARU, 20 Marsu 2025 (TATOLI)—Konsellu Munisipál Kombatentes Libertasaun Nasionál (CMCLN) Munisípiu Bobonaru, iha tersa (18 Marsu 2025) ne’e, hahú husi simu fali reklamasaun no kontestasaun husi Kombatente sira ne’ebé la satisfás ho publikasaun lista editál segundu rejistadu 2009 inklui sira-ne’ebé atu hadi’ak dadus primeiru rejistu 2003.
Notísia Relevante: Veteranu iha Bobonaro lamenta lista validasaun kombatente rejistadu 2009
Atendimentu ne’e, CMCLN Munisípiu Bobonaru realiza bazeia ba despaixu númeru 004 MACLN -IXGC/III/2025 kona-bá Extensaun prazu ba aprezentansaun reklamasaun no kontestasaun ba dadus Rejistu kombatente Libertasaun Nasionál.
Prazu aprezentansaun ne’e durante loron 30 ne’ebé hahú husi loron 18 fulan-Marsu to’o loron 18 fulan-Abril tinan 2025, no liuhusi loron ne’ebé termina ne’e mak CMCLN sei la halo atendementu.
“Komesa horbainrua loron tersa (18/03/2025) horisehik, sira rona ona no sira mai nakonu ona iha ne’e,” Vise-Prezidente CMCLN Munisípiu Bobonaru, Lucio Dinis Marqués ‘Onsar’, informa ba Jornalista sira, iha nia kna’ar fatin Bairu Antigu SMP1 Maliana, kinta ne’e.
Nia dehan, despaixu ne’e MAKLN fó sai tanba Kombatente foin lalais ne’e la konsege aprezenta Reklamasaun no Kontestasaun tanba hela do’ok no falta informasaun.
CMCLN mos hato’o ona imformasaun ba responsavél Zona, Nurep sira atu hatutan informasaun hirak ne’e ba suku 50, nune’e kombatente sira-ne’ebé hela iha área rurál bele asesu hodi mai aprezenta reklamasaun no kontestasaun.
“Ita iha postu neen, tempu udan tan estrada ladi’ak, sira atu mai iha motor de’it liu la di’ak, entaun ho situasaun ne’e ita-nia Ministru adianta dalan ida tan, atu nune’e maluk sira dook ne’e bele aproxima. Mai para ami bele kompleta sira nia dukumentus prienxe reklamasaun no kontentstasaun hodi bele aprezenta ba Ministériu, sé mak servisu hakerek dadus halo di’ak, sé mak la servisu kontesta nia hodi nia mós iha direitu ka laiha direitu, ne’e ba Ministériu mak tetu,” nia dehan.
Sekretáriu CMCLN Munisipál ne’e haktuir, durante ne’e situasaun iha munisípiu Bobonaru la’o ho hakmatek.
“Ami sempre esplika prosesu ne’e ba kombatente sira. Ita haree ita-nia kombatente sira iha Munisípiu Bobonaru ne’e kalma, ladún iha dezentendimentu. Balun iha dezentendimentu maibé ami sempre hakalma ho situasaun ne’ebé ami iha, ami hato’o ba sira atu sira mós bele komprende,” nia dehan.
Enkuantu, antes ne’e, CMCLN Munisípiu Bobonaru submete ona formuláriu reklamasaun no kontestasaun hamutuk 3,565 ba MAKLN.
Notísia Relevante: MAKLN apresia publikasaun lista editál 2009 iha Bobonaru la’o ho di’ak
Jornalista : Sérgio da Cruz
Editór : Cancio Ximenes
