COVALIMA, 22 Marsu 2025 (TATOLI) – Eis Prezidente-Republika, Taur Matan Ruak triste ho Prezidente Autoridade Munisípiu (PAM) Kovalima, Miguel Armada Cardoso nia-desizaun orienta ba dirijente sira bainhira atu halo entevista presiza husu autorizasaun.
Ho desizaun ne’e, Eis Xefe Estadu ne’e informa katak Timor-Leste la’os nasaun ne’ebé ditadura nune’e daudaun ne’e Timor Leste nia ranking Liberdade imprensa tuun tanba polítiku sira mak kontribui hodi hamo’e Estadu.
Notisia relevante:Mekanizmu foun asesu informasaun ba kargu xefia iha Kovalima
“Triste ita-boot sira haree ita-nia ranking liberdade imprensa monu. Iha ha’u nia tempu di’ak imi hanoin loloos militar mak ditadura, Ranking liberdade Timor-Leste tun polítiku sira mak ajuda halo ranking tuun bodi hamo’e Timor”, Eis PR ne’e hato’o ba jornalista sira hafoin hala’o atividade diálogu iha otel vida-Nova Bairru Costa ,ohin
Ho nune’e, Lidér nasionál ne’e fó hanoin bainhira taka dalan no impede atu asesu informasaun ida-ne’e hafo’er Timor-Leste nia naran tuir loloos hanesan lideransa presiza atu hamorin Timor nia-naran.
“Ita taka dalan no halo impedimentu ne’e hamonu ita nia naran no kontribui hodi hafo’er Timor nia naran”. nia informa.
Molok ne’e, iha Loron 10-Marsu ne’e Prezidente Autoridade Munisípiu Kovalima, Miguel Armanda Cardoso mós klarifika katak Diretór Munisipál atu fó sai informasaun presiza husu Autoridade Kovalima ho razaun dirijente sira fó sai informasaun tuir sira nia servisu no balun fó sai informasaun la tuir sira-nia servisu.
Notisia relevante:AJTL-TLPU kondena protokolu PA RAEOA impede serbisu Jornalista
Jornalista: Celestina Teles
Editór: Florencio Miranda Ximenes
