BOBONARU, 24 Marsu 2025 (TATOLI)-Membru Asembleia Postu Administrativu (ASPA), postu Bobonaru, munisípiu Bobonaru konsege hili planu prioridade sia hodi prevee ba orsamentu 2026 ba programa Planu Dezembvimentu Integradu Munisipál (PDIM).
Planu prioridade ne’e trasa liuhusi enkontru dahuluk ne’ebé akontese iha loron 20 fulan-Marsu 2025.
Administradór postu administrativu Bobonaru, munisípiu Bobonaru, Tomás Barreto Henriques, informa prioridade sira mak reabilitasaun uma antigu koloniál portugués iha Bobonaru Villa, konstrusaun sala tolu ba Ensinu Bázika Sentrál Dom Caileto, reablitasaun estrada iha suku Ai-Asa ho distansia kilómetru tolu, sede juventude suku Sibuni.
Prioridade seluk mak konstrusaun estrada husi suku Lour bá suku Ai-Asa, kanalizasaun bee-moos iha suku Leber, konstrusaun postu saúde suku Tapo, estrada husi Grotu, Aiarasa ba suku Atuaben, konstrusaun postu aaúde Purugua, suku Ilat-laun.
Notísia Relevante:Saúde Bobonaro propoin projetu hitu iha PDIM 2024
“Prioridade ne’e maihusi aldeia 63, depois ba suku 50, entaun ita lori mai fali iha enkontru postu ninia, ita iha postu neen ne’ebé akontese tinan-tinan, ne’e la signifika sia atu ba hotu, sira halo taes iha ne’ebá, ida ne’ebé mak tama prioridade sira foti, la’os sia ne’e ba hotu, sira foti rua ou tolu hanesan ne’e”, nia informa ba TATOLI iha kna’ar fatin, segunda ne’e.
Tomás haklaken, tinan ne’e foti prioridade ba suku sia de’it ho razaun iha mandatu administradór postu administrativu sesante kria ona akordu ida ho lideransa komunitária sira katak tinan ida avansa ho suku sia no tinan tuir mai mak oportunidade fali ba suku sia tanba postu Bobonaru iha kedas suku 18.
Autoridade postu administrativu ne’e esklarese husi prioridade sia ne’e iha prioridade rua hanesan konstrusaun estrada iha suku Lour bá aldeia Oalgomo, suku Ai-Asa no kanalizasaun bee-moos iha suku Leber mak tama ona prioridade projetu Programa Nasional Dezembolvimentu Suku (PNDS) atu implementa.
Nia hatutan liuhusi enkontru ASPA hili prioridade ba reablitasaun uma antigu koloniál Portugál husik hela tanba obra ne’e nu’udar patrimóniu istoriku ne’ebé presiza tau-matan.
Nia dehan prioridade ba uma antigu portugés tanba bele utiliza ba alojamentu, bainhira bainaka sira presiza fatin ba deskansa. Ida ne’e mos parte ida husi reseita.
Eis-membru F-FDTL ne’e informa, nia parte ho xefe suku Tapo, Xavier Barreto, sei defende prioridade hirak ne’e iha reuníaun Konsellu Koordenasaun Munisipál hodi propoin ba nasionál nune’e governu bele konsidera pelu-menus rua ou tolu.
“Ami postu Bobonaru ne’e kada tinan dehan laiha ne’e lae, rua ne’e sempre, foin lalais ne’e ha’u mos hato’o lamentasaun ba Prezidente Autoridade, loloos ne’e ami postu Bobonaru ne’e hetan tolu ou haat, razaun mak ami postu Bobonaru ne’e jeografikamente área luan, ami iha aldeia 63 suku 18, kompara ho postu lima ne’e, ita halo diviziaun Bobonaru ne’e bele hetan postu haat, tanba ne’e mak ami husu tolu to’o ha’at atu bele iha balansu no ema bele dezenvolve husi programa governu nia la’o iha suku”, hakotu nia.
Sorin seluk, reprezentante intelektuál Marobo, suku Ilat-Laut, Manuel Bere Afonso, rekomenda ba autoridade munisípál Bobonaru atu aprova konstrusaun postu saúde iha aldeia Purugua no governu mos presiza konsidera iha planu orsamentu tinan oin, tanba durante tinan 20 resin ona komunidade asesu ba fasilidade saúde tenke la’o ho distansia dook.
“Sira la’o kuaze kilo rua ou tolu hansan mak foin to’o postu saúde Ilat-laun, depois sa’e mai ne’e dalan subida, perigu loos ba sira nia vida, tempu bai-loro sira bele mai konsulta, maibé udan fali sira labele tanba mota boot, difísil tebes atu liu”, katak nia ba TATOLI iha área Maulolok.
Nia realsa, tempu udan inan-feton sira ne’ebé ho kondisaun gravida obrigadu partus iha de’it uma, tanba ambulánsia mós difísil atu asesu.
Tinan ne’e, postu administrativu Bobonaru hetan projetu PDIM rua hanesan konstrusaun sala tolu iha Ensinu Báziku Filiál (EBF) Beamuas, suku Kolimau ho kustu estimativu rihun $120 no reablitasaun ba rezidensia pesoál saúde iha sentru saúde komunitáriu postu administrativu Bobonaru ho kustu estimativu rihun $123,884.73.
Notísia Relevante:Autoridade Bobonaru sei implementa projetu PDIM 2025 iha tempu badak
Jornalista : Sergio da Cruz
Editora : Rita Almeida
