DILI, 24 Marsu 2025 (TATOLI)—Diretór Servisu Saúde Munisípiu Dili, Mateus Pinto, hateten durante Marsu tinan ne’e, Servisu Saúde Munisípiu Dili (SSMD) rejista kazu dengue hamutuk 84 no husi númeru ne’e (84), na’in-ida mate.
“Husi inísiu fulan-Marsu mai to’o horisehik ne’e, ita rejista ona kazu dengue hamutuk 84. Husi númeru ne’e, na’in ida mak mate,” Mateus Pinto, informa ba TATOLI iha nia kna’ar fatin, Sentru Saúde Formosa, segunda ne’e.
Nia esplika, husi kazu sira-ne’e maioria mai husi Postu Administrativu Dom Aleixo, tuir Kristu-Rei, Metinaru, Na’in Feto no Vera-Krúz.
“Labarik sira-ne’ebé mak hetan dengue ne’e husi idade tinan lima to’o 14, tinan 1-4, idade 25-49 no menus husi tinan ida,” nia haktuir.
Nia relata, kona-ba fomigasaun no abate, Servisu Saúde Munisípiu Dili nafatin orienta ekipa sira la’o tama-sai bairru hodi halo prevensaun ba kazu dengue ida-ne’e.
Notísia relevante: SSMD rejista kazu dengue hamutuk 50, afeta liubá labarik sira
Entretantu, husi Janeiru mai to’o Marsu, Servisu Saúde Munisípiu Dili, rejista ona kazu dengue hamutuk 267. Husi ne’e, fulan-Janeiru kazu dengue hamutuk 75 no mate ida, Fevereiru 108 no Marsu 84 no mate ida.
Dengue nu’udár moras ida-ne’ebé kauza husi virus no hada’et liuhusi vektor. Moras ne’e hada’et husi susuk Aedes Aegypti infetadu husi nia tata. Dengue la hada’et husi ema bá ema. Intensidade tata aas liu mak maizumenus oras rua hafoin loro-matan sa’e no molok loro-matan tun.
Sinál sintoma husi dengue mak hanesan isin-manas, ulun moras maka’as, moras iha matan-fukun, múskulu no artikulasaun moras maka’as, mosu erupsaun iha kulit.
Kona-ba tratamentu dengue, laiha tratamentu espesífiku hodi hamate virus dengue iha ema-nia isin. Ba ema ne’ebé hetan infesaun no baixa iha fasilidade saúde, médiku sira hala’o de’it jestaun kazu ne’ebé di’ak. Jestaun kazu ne’e mak hala’o liuhusi maneira hanesan, fó nutrisaun iha fasilidade saúde hanesan fó soru-been, fó hemu bee no fó han ai-fuan vitamina barak. Médiku sira dalaruma fó mós ai-moruk parasetamól hodi rezolve isin-manas ne’ebé iha.
Halo prevensaun mak liuhusi fomigasaun no prevene susuk atu moris liuhusi troka bee iha tanke, bidón, balde no vazu ai-funan kada semana, liuhusi protesaun pesoál hanesan uza repelente iha isin-lolon no hatais ropa ne’ebe taka isin-lolon.
Jornalista: Felicidade Ximenes
Editór: Xisto Freitas da Piedade
