DILI, 25 Marsu 2025 (TATOLI) – Koordenadór Zona Ekonómika Espesiál Dezenvolvimentu Ambeno (ZEEDOA), João Gonçalves no ekipa hala’o enkontru kortezia ho Primeiru-ministru Kaylara Xanana Gusmão hodi submete dokumentu kona-ba zona ekonómika nian iha Palásiu Governu, ohin.
Koordenadór ne’e informa katak objetivu husi enkontru ne’e mak atu submete dokumentu husi Zona Ekonómika Espesiál Dezenvolvimentu Ambeno kona-ba estabelesimentu ministeriál, estudu viabilidade no enkuadramentu legál.
“Primeiru atu dehan katak kami mak halo pedidu audiénsia ho sua exelénsia, hodi mai hato’o dokumentu balun tan ne’ebé ami prepara kona-ba ZEEDOA, liuliu estabelesimentu parte ministeriál nian ho tan estudu viabilidade balun ne’ebé presiza atu hala’o no ko’alia mós kona-ba ami nia enkuadramentu legál”, Koordenadór ZEEDOA, João Gonçalves, ba jornalista sira, hafoin enkontru.
Kona-ba enkuadramentu legál ne’ebé antes ne’e submete ona no daudaun ne’e iha Gabinete Jurídiku Konsellu Ministru nian no hein rezultadu aprovasaun husi Konsellu Ministru, tanba buat hotu sei iha prosesu estudu nune’e hein desizaun husi Primeiru-ministru.
“Ami-nia enkuadramentu legál ne’ebé maka sei hein no aprova iha Konsellu-Ministru, no Primeiru-Ministru dehan katak buat ne’e sei iha estudu nia laran, ne’e duni iha tempu-badak para foti ona desizaun kona-ba suntu ida-ne’e. Daudaun ne’e dokumentu iha ona Gabinete Jurídiku Konsellu Ministru”, koordenadór ne’e informa.
Notísia relevante:Xanana husu autoridade RAEOA-ZEEDOA kumpre misaun-dever hadi’a povu nia moris
Entretantu, iha estudu viabilidade sei liga ba bee-moos, no Estrada no Zona Ekonómika Espesiál Dezenvolvimentu Ambeno mós halo ona identifikasaun ba bee-matan lubuk ida ne’ebé kobre iha sub-rejiaun hotu-hotu, ne’e duni atu haree no halo estudu viabilidade hodi bele implementa hodi komunidade no animál sira bele asesu.
“Estudu viabilidade bee-moos no estrada, enkuantu bee-moos nian ami iha relatóriu estudu rejiaun no ami identifika tiha ona purtantu bee-matan lubuk ida iha sub-rejiaun hotu-hotu ne’e duni ita atu haree oinsá ita halo estudu viabilidade hodi halo kaptasaun purifikasaun ba bee para ema bele hemu, barazen ba irigasaun natar no animál”, nia hateten.
Nia akresenta sei kontinua hadi’a mós estrada husi diresaun Pante Makassar ba Oe-silo no presiza tau postu integradu ida iha ne’ebá, inklui mós estrada ne’ebé halo ona konstrusaun to’o Oenunu presiza kontinuidade to’o Sitrana, nune’e ba kupang mós bele husi diresaun ne’e.
Tuir informasaun antes selebra loron paskua Primeiru Ministru sei iha planu vizita Oe-kusse, hodi halo avalaiasaun finál bainhira nia foti desizaun kona-ba futuru RAEOA nia no preokupasaun sira ne’ebé iha.
Notísia relevante:Governu sei define estrutura no funsaun Autoridade RAEOA-ZEEDOA
Jornalista: Alexandra da Costa
Editór: Rafael Ximenes de A. Belo
