OEKUSI, 20 Fevereiru 2025 (TATOLI) – Primeiru-Ministru, Kay Rala Xanana Gusmão, kinta ne’e, molok fila hikas mai Dili, hato’o hela mensajén ba Autoridade Rejiaun Administrativa Espesiál Oekusi Ambeno (RAEOA) no Komisaun Ezekutiva Zona Ekonómia Espesiál Dezenvolvimentu Oekusi Ambeno (ZEEDOA) atu serbisu tuir misaun no dever hodi hadi’a povu Oekusi nia moris.
Xefe Governu hato’o nia mensajen ne’e hafoin hala’o enkontru ikus ho Autoridade RAEOA no ekipa ZEEDOA iha salaun Gabinete Prezidente RAEOA nian, molok viajén bá Dili.
Notísia relevante:PM Xanana husu Oekusi-oan prepara-aan hodi lidera RAEOA iha 2026
“Ha’u mai loron haat iha ne’e, mai ko’alia ho autoridade no estrutura ne’ébé servisu iha ne’e presiza duni hanoin foun no esforsu foun hodi hadi’a povu nia moris. Tanba RAEOA moris husi Konstituisaun Repúblika. Tanba enklave ida, la’ós hanesan munisipíu seluk,” Xefe Governu hateten hafoin halo enkontru ikus iha Oekusi, ohin.
PM Xanana lembra ZEESM kria tinan 10 ona iha Oekusi maibé laiha mudansa tanba dezenvolvimentu konsetradu de’it iha sidade Pante Makasar, maibé to’o sub rejiaun no suku no aldeia sira populasaun moris ho estrada aat no la asesu eletrisidade.
“Husu sekretáru rejionál sira, ZEEDOA no Autoridade RAEOA kontinua serbisu tuir ida-idak funsaun no bele halo serbisu hamutuk hodi lori povu ba moris di’ak,” nia afirma.
Notísia relevante:PM Xanana husu Autoridade RAEOA-ZEEDOA promove koordenasaun serbisu iha administrasaun públika
Primeiru-Ministru mós agradese ba Prezidente Autoridade RAEOA no ZEEDOA tanba bele konvida mai iha Oekusi hodi hala’o observasaun ba progresu dezenvolvimentu liuliu estrada, eletrisidade no bee-moos.
“Ba estrada foun sira-ne’ebé konstrui ona no la’o daudaun ne’e populasaun sira kontente tebes tanba tinan 10 sira foin mak haree katak bele iha ona hanoin ida atu loke dalan ba sira atu asesu”, Xefe Governu observa.
Nia relata rejista rekomendasaun lubun ida husi komunidade sira kona-ba falta bee-moos, elétrisidade no sentru saúde.
“Ida-ne’e mak ha’u-nia serbisu durante iha Oekusi ohin ami halo enkontru hodi enkoraja sira atu hanoin, la’ós hanoin de’it mai hetan servisu atu manán osan, maibé mai servisu ho misaun ida ho dever ida atu hanoin kona-ba rai ne’e no hanoin kona-ba povu ne’e nia moris di’ak,” Xanana apela.
Tuir observasaun Jornalista TATOLI,I.P, iha parte dadeer ne’e mós Xefe Governu hala’o vizita ba fatin servisu ekipa husi ZEEDOA, Gabinete Prezidente Autoridade RAEOA nian no mós servisu Sekretária Rejionál Finansia nian.
Notísia relevante:PM Xanana: Oekusi-oan presiza prepara aan hodi simu podér lokál no desentralizasaun administrativa
Jornalista: Abílio Elo Nini
Editór: Florencio Miranda Ximenes
