BOBONARU, 27 Marsu 2025 (TATOLI)-Konsellu Kombatente Libertasaun Nasionál (CCLN sigla portugés) munisípiu Bobonaru, parabeniza Polísia Nasionál Timor-Leste (PNTL) ne’ebé ohin loron (27/3/2025) selebra ezisténsia hanesan instituisaun seguransa ba da-25.
Vise Prezidente CCLN Munisípiu Bobonaru, Lucio Dinis Marqués ‘Onsar’, hateten apoiu másimu servisu PNTL hodi asegura sidade, suku to’o aldeia.
Nia hatutan atuasaun PNTL iha terrenu tenke tuir lei hodi hases interese famíliarizmu, liu-liu grupu tanba prezensa autoridade seguransa iha kualker fatin akontesimentu atu atua no hakalma hodi lori dame no hakmatek ba ema hotu.
Notísia Relévante:Aniversáriu ba dala-24: Xefe Estadu husu PNTL garante pás, estabilidade no respeita direitu umanu
“Ba futuru ne’e ami presiza polísia profesionál, polísia ne’ebé pelu-menus serbísu labele haree ba família, maibé haree buat ida Estadu”, dehan nia ba TATOLI iha ninia knaar fatin.
Eis-rezisténsia ne’e afirma, PNTL ezerse ona funsaun hodi asegura pás no establidade iha rai-laran, maibé nia observa kondisaun ne’ebé membru sira hasoru ladun favorese, liu-liu komandu no unidade ne’ebé koloka iha liña fronteira.
“Sira menus transporte, laiha rádiu, fardamentu tinan rua no tolu ita haree la troka, ida ne’e mak halo moe fali ita”, dehan nia.
Nia hatutan: “Ami hakarak ita-nia polísia iha fronteira ne’e iha kondisaun, tanba ita besik Indonezia”.
Reprezentante povu munisípiu Bobonaru, Calisto de Jesus Lopes, rekomenda ba PNTL bainhira halo atuansaun ruma tenke respeita direitu umanu no prontu simu krítika bainhira komete erru ruma.
“PNTL mak instituisaun seguransa ida-ne’e povu sadere no tau konfiansa tomak bainhira nia iha situasaun perigu no ameasa nia-laran, entaun sira halo problema ruma karik atua ho didiak, sira balu ne’ebé ulun toos karik hakalma ho tekniku ne’ebé ita-bo’ot sira hetan, tanba papel PNTL nia ne’e atu asegura, hanesan ahi-lakan karik ita mai rega, la’os sunu halo lakan tan”, katak nia.
Notísia Relevante:Aniversáriu bá da-24, PAM Bobonaro husu PNTL hakbesik ba povu
Jornalista : Sergio da Cruz
Editora : Rita Almeida
