KOVALIMA, 27 Marsu 2025 (TATOLI) – Prezidente Repúblika, José Ramos Horta, triste bainhira haree kondisaun infraestrutura hanesan estrada liga husi munisípiu Kovalima mai iha Postu administrativu Tilomar ba suku sira.
Timor-Leste festeza nia independénsia tinan 20-resin ona maibé Governu ida seidauk fó atensaun ba fronteira sira.
“Rai hotu iha mundu ha’u vizita, Áfrika ka iha Ázia no rai sidade sira sempre dezenvolvidu infraestrutura no kondisaun oioin; saúde, komérsiu barak mezmu iha rai ki’ik sira ”, Xefe Estadu haktuir ba jornalista sira iha Tilomar, ohin.
Tuir Horta, ho kondisaun infraestrutura, hanesan xefe Estadu sempre ko’alia beibeik ona ho Governu hahú mandatu ba dahuluk to’o ohin loron, tanba iha 1975 nia mós vizita fronteira no 2006 vizita fronteira ho embaxadór Indonézia.
Nune’e, Xefe Estadu espera katak Ministériu relevante ne’ebé iha responsabilidade hodi haree, tenke fó prióridade fronteira.
Ho kondisaun estrada iha Tilomar, xefe Estadu husu deskulpa komunidade iha Fronteira ne’ebé seidauk tau-matan ba kondisaun infraestrutura iha aldeia, suku no postu sira iha fronteira bainhira iha loron ruma Primeiru-ministru bele mai vizita.
Iha sorin seluk, Administradór Postu Tilomar, Venâncio Sarmento agradese xefe Estadu tanba vizita direta hodi haree kondisaun no situasaun infraestrutura iha postu administrativu ne’e.
“Ita haree kondisaun estrada grave tebes durante komunidade sira halo movimentu ba mai husi postu ba kapitál munisípiu”, nia haktuir.
Notísia relevante:Reprezentante povu sira kontinua preokupa ho kondisaun estrada
Jornalista:Celestina Teles
Editór: Rafael Ximenes de A. Belo
