DILI, 28 Marsu 2025 (TATOLI) – Sekretáriu Estadu Toponómia Organizasaun Urbana (SEATOU), Germano Santa Brites Dias, hateten, sei laiha toleránsia ba hahalok sira ne’ebé estraga ho hakerek kadeira iha fatin destinasaun turístiku, Kristu Rei, Dili.
“Ekipa sei ba kontrola, se ita toman nia hakerek hela, pasiénsia nia tenki simu risku. Agora ita ko’alia halimar ne’e halimar. Ha’u servisu ba loos mai loos. Ha’u nunka atu hakarak halimar ho ema ne’ebé mak la tolera ka lakohi kuidadu sasan Estadu nian di’ak ba ita hotu”, Sekretátriu informa ba jornalista sira, iha semináriu webinar online, ne’ebé organiza husi Asosiasaun Estudante Timoroan iha Japaun (AETJ), iha Salaun enkontru MAE, Kaikoli, Dili, kinta ne’e.
Notísia relevante:AETJ – SEATOU no sosiedade sívil aborda polítika implementasaun urbanizasaun no direitu umanu
SEATOU afirma katak sei la tolera fatin turizmu nian uza konforme hakarak tanba Estadu investe osan boot ba fatin ida-ne’e para ita hotu-hotu goza. La’ós ida-idak ba halo tuir nia hakarak ne’e lae.
“Kuandu ita toman, pasiénsia keta hirus mós regras mak la’o hanesan ne’e. Sei haree mós kona-ba vendedores ambulante sira ne’ebé mak halo negósiu iha Estrada-ninin, Kristu Rei nian, atu soe lixu tuir nia fatin, no presiza koopera malu atu paisajen fatin turizmu ne’e bele moos no furak nafatin,” nia apela.
Notísia relevante:Reabilitasaun sítiu turistiku Cristo Rei atinje ona 60%
Kona-ba vendendór sira, Governante ne’e informa katak sei tau regra ho sedu iha tempu-badak nune’e evita lixu, iha área Kristu Rei.
“Sira rasik ami toman, sé mak tunu batar, lees batar kulit tau iha ne’ebá, ami haruka na’in ra’ut tau iha saku tau iha nia karosa lori ba nia uma. Ohin, ita rona katak lei ne’e mak to’os, entaun di’ak liu koopera de’it para ita bele halo servisu ne’e ajuda malu”, nia fó hanoin.
Entretantu, ekipa konjunta SEATOU mós sei halo observasaun hodi kontrola hahalok vandalizmu sira iha terrenu ho meiu, posibilidade, sei koloka mós ekipa ida iha área Kristu Rei hodi toma responsabilidade halo kontrolu iha ne’ebá.
Notísia relevante:Kristu Rei, Fatin Turístika Ne’ebé Atraente
Jornalista: Alexandra da Costa
Editór: Rafael Ximenes de A. Belo
