DILI, 04 Jullu 2024 (TATOLI)—Jerente empreza PT Eureka Gagas Utama husi Indonézia, Seno Krisdiansyah, hateten obra reabilitasaun ba sítiu turizmu relijiozu iha Cristo Rei, Fatucama, Dili, ne’e atinje ona 60%.
Notísia Relevante: Reabilitasaun igreja Motael atinje ona 65%
“Servisu ne’ebé hotu ona agora mak hadi’a para fatin ka parkir no pinta kapela ne’e hotu ona. Servisu rua ne’e atinje 100%. Tanba ne’e mak reabilitasaun ne’e ita dehan atinje ona 60%,” Seno Krisdiansyah hateten ba Agência Tatoli iha Motael, kuarta (03 jullu 2024) ne’e.
Nia deham, servisu preparasaun ai-riin ba iluminasaun (lampu eletrisidade) iha eskada mós atinje ona to’o 75% no hein instala ka hatutan de’it fiu sira hodi lakan.
Servisu sira seluk ne’e, nia dehan, agora la’o hela no iha nia progresu hanesan servisu nahe pavimentu ne’e to’o ona 50%, hadi’a eskada ba estatua Cristo Rei to’o iha foho Fatucama tutun ne’e atinje 35%.
“Eskada sira ami sei pinta de’it. Maibé, ida-ne’ebé estraga hotu ona, ami sei baku rahun hodi halo foun fali de’it,” nia hateten.
Tuir planu, empreza mós sei hadi’a estátua Cristo Rei ne’ebé inklui mós iha projetu reabilitasaun ba eskada, lampu no nahe pavimentu.
Buat foun ne’ebé mak empreza harii mak unidade sintina públiku ida iha Cristo Rei atu responde ba iha nesesidade vizitante ka turista sira-nian iha fatin ne’ebá.
“Bu’at ida foun mak harii toilet, restante ne’e halo reabilitasaun de’it,” nia dehan.
Tuir nia, bee-moos ne’ebé fornese ba iha sintin públiku ka toilet ne’ebá ne’e fornese husi Bee Timor-Leste, Empreza Públika (BTL, E.P) ne’ebé kanaliza ona ba iha Cristo Rei.
“Ita-nia servisu ne’e sei termina iha fulan-agostu nia klaran, molok akontese atividade Papa Francisco halo vizita pastorál iha Timor-Leste, iha 09-11 setembru 2024,” nia hateten.
Cristo Rei
Estátua Cristo Rei harii iha foho Fatucama nia tutun iha parte Leste sidade Dili nian. Estátua ne’e halo husi liman-badaen Mochamad Syailillah ka Bolil hodi selebra loron integrasaun Timor-Timur (Timtim hanesan provinsia ba da-27 iha Negara Kesatuan Republik Indonesia), ne’ebé inaugura husi Prezidente RI, Soeharto, Bispu Adminstradór Apostolika Dili, Dom Carlos Filipe Ximenes Belo, SDB, Governadór Timor-Timur, José Abílio Osório Soares, iha 15 outubru 1996.
Líder na’in-tolu (3) ne’e akompaña inaugurasaun ba estátua ne’e iha aviaun elikóptru leten. Estátua Cristo rei ne’e hetan prémiu husi Museum Rekor Indonesia (MURI) hanesan estátua aas liu iha Indonézia.
Notísia Relevante: Konstrusaun altar no toilet ba VIP iha Tasi-Tolu atinje ona 76%-70%
Estátua Cristo Rei iha Fatucama-Dili ne’e ho nia aas metru 27. Númeru ne’e hanesan simbólu ka tada ida Timor-Timur hanesan provinsia Indonézia ba da-27. Estátua ne’e hanesan estátua boot-liu ba daruak iha mundu hafoin Estátua Christ The Redeemer ka estátua Cristo Rei iha Rio de Janeiro-Brazil, ho aas metru 36 iha foho ida ho nia aas kilómetru 1,5.
Isória
Ideia konstrusaun estátua Cristo Rei ne’e, maihusi Governadór Timor-Timur, José Abílio Osório Soares (Jerasaun Manatuto), ne’ebé hato’o ba Prezidente Republik Indonesia (RI), Soeharto, hanesan prezente ida ba aniversáriu Integrasaun Timor-Timur ba da-20 (17 jullu 1975-17 jullu 1996).
Prezidente RI, Soeharto, indika Diretór PT Garuda Indonesia lidera projetu ne’e. Empreza Garuda iha ninia responsabilidade atu buka fundu hodi finansia projetu konstrusaun estátua Cristo Rei ne’e no konsege halibur orsamentu hamutuk Rp 1.1 milyar ($123,000). Maibé, totál orsamentu ne’e la to’o atu konstrui estátua ne’e, no aumenta tan kontribuisaun husi Pegawai Negeri Sipil (PNS) ka Funsionáriu Públiku (FP) no emprezariu sira iha Timor-Timur atu finaliza projetu ne’e, no to’o ikus rekolla no gasta osan totál hamutuk Rp 5 milyar ($559,000).
Prosesu konstrui estátua Cristo Rei ne’e gasta tempu durante tinan ida-nia laran ne’ebé konstrui husi servisu-na’in hamutuk 30 iha Sukaraja, Bandung, Jawa Barat, Indonézia. Estátua ne’e halo husi besi riti (tembaga), hafoin transporta hodi uza “tiga trailer” hodi lori ba Dili. Prosesu rekonstrusaun ba estátua ne’e, inklui globu (bola dunia) no krús ho aas metru 10 ne’e, iha tempu to’o fulan tolu.
Objetu turizmu relizioju
Área Cristo Rei Fatucama hanesan fatin ba vizitante sira liuliu sarani Katólika sira atu reza ka halo peregrinasaun, fatin ne’e sai hanesan objetu turizmu relizioju ka ispirituál iha Timor-Leste.
Kada loron sábadu-domingu no loorn feriadu nasionál sira-ne’e, área ne’e sai fatin ikus ba komunidade hodi kasu kolen. Aleinde ne’e, turista doméstika no turista estranjeiru sira mós mai vizita fatin ne’e atu haree paisajen nia furak inklui hanesan fonte ba inspirasaun espirituál.
Antes vizitante sira halo peregrinasaun to’o iha fatin estátua Cristo Rei hatuur iha foho Fatucama nia tutun ne’e, peregrinu sira sei hakat liu estasaun 14, ne’ebé sai hanesan fatin halo orasaun ba sarani katólika sira, ne’ebé reprezenta pontu parajen (tempat perhentian) ba Jesus Kristu nia terus (mistériu dolorozu) iha foho Golgota.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes
