BOBONARU, 28 Marsu 2025 (TATOLI)—Diretór Servisu Munisipál Edukasaun Munisípiu Bobonaru, Miguel Freitas, justifika orsamentu Programa Merenda Eskolar (PME) ano letivu 2025 hahú husi fulan-Janeiru no fulan-Fevereiru nian tenke fila-fali ba kofre Estadu tanba la konsege ezekuta.
Notísia Relevante: Edukasaun Bobonaru implementa ona PME 2025 ba estudante 29.078
Diretór Miguel Freitas, deklara orsamentu ne’e la konsege ezekuta tanba submisaun dadus estudante husi dirijente eskola sira atraza, hodi la fó sai orsamentu hira mak fó fila ba kofre Estadu.
“Agora, Janeiru-Fevereiru hakarak ka lakohi tenke fila-fali ba kofre Estadu tanba ita foin implementa iha Marsu ne’e. osan ida fó fila ba kofre Estadu ne’e nia montante ha’u laduun saida, maibé ha’u atu dehan katak tinan uluk mak Janeiru-Fevreiru ho Marsu, fulan tolu nian fila ba kofreEstadu tanba dadaus tama tarde. Ho ida-ne’e mak ita hetan bolu atensaun husi Prezidente Autoridade Munisípiu dehan katak Ezekusaun orsamentu husi Edukasaun ne’e fó fila mak barak,” Nia hateten durante halo enkontru ho dirijente eskola sira ha Salaun Maria-Tapo, sesta ne’e.
Nune’e, nia apela ba diretór no koordenadór eskola sira kumpre orientasaun halo mátrikula ba estudante hahú husi 18 to’o 22 no loron 24 to’o 28 Dezembru, tenke submete ona dadus kompletu ba Servisu Munisipál Edukasaun.
“Ita ezije hakarak Programa Merenda Eskolár ne’e hakarak la’o ho tempu ne’ebé justu, ita hakarak relatóriu mai sedu, labele demora to’o Janeiru nia rohan mak balun foin hatama. Ida-ne’e mak fó impaktu ba ita-nia implementasaun Programa Merenda Eskolár la’o atraza ne’e. Entaun, ita tenke tau atensaun tanba Programa Merenda Eskolár iha territóriu laran tomak, ema tau atensaun makaas ne’ebé ezekuta tenke ho didi’ak,” nia dehan.
Tuir dadus ne’ebé Diresaun Servisu Edukasaun Munisípiu Bobonaru rekolla estudante ne’ebé asesu Programa Merenda Eskolár tinan 2025 hamutuk na’in-29,78 mai husi Ensinu Báziku no Pre-Eskolár Públiku hamutuk 26,516 no Ensinu Báziku ho Pre-Eskolár Katólika hamutuk 2,562.
Programa ne’e implementa iha eskola Públiku hamutuk 179, ne’ebé kompostu husi Ensinu Báziku hamutuk 137 mak hanesan Ensinu Báziku Sentrál (EBC, sigla portugés) hamutuk 23 no Ensinu Báziku Filiál (EBF) hamutuk 114, Ensinu Pre-Eskolár hamutuk 32, Ensinu Báziku no Ensinu Pre-Eskolár Katóliku hamutuk 24, kompostu husi EBC eskola neen (6), EBF 10, enkuantu Ensinu Pre-Eskolár Katóliku hamutuk ualu (8).
Totál orsamentu PME tinan 2025 ne’ebé Autoridade Munisípiu Bobonaru aloka hamutuk millaun $1,758,783,60, no ho montante ne’e fahe ba Ensinu Báziku públiku no Katóliku hamutuk $1,564,829,28 ho totál loron efetivu 141, enkuantu Pre-Eskolár Públiku no Katólika hamutuk $193, 954,32 ba loron efetivu hamutuk 174.
Notísia Relevante: DSME Bobonaru forma rede monitorizasaun tau matan ba PME
Jornalista : Sérgio da Cruz
Editór : Cancio Ximenes
