DILI,31 marsu 2025 (TATOLI)— Diretora Servisu Asisténsia Klinika iha Hospitál Nasionál Guido Valadares (HNGV), Ana Magno, relata espesialista nai’n-haat husi Austrália fó ona tratamentu saúde ba labarik.
“Ohin loron 31 fulan-Marsu, Médiku espesialista na’in-haat hahú konsulta ba labarik sira no aban loron 1 to’o 11 fulan-Abril sei fó operasaun ba labarik pasiente sira ba kazu sira ne’ebé mak presiza halo intervensaun,” Diretora Ana Magno dehan ba jornalista sira iha HNGV, ohin.
Notisia relevante:Espesialista Austrália sei fó konsulta ba labarik sira iha HNGV
Médiku espesialista konsulta labarik na’in-115, husi númeru ne’e iha pasiente na’in-60 mak sei halo operasaun ho gratuitu
“Konsulta no halo operasaun ne’e ho gratuitu ba labarik sira ne’ebé mak moris mai hanesan imperforete anus ka moras ho kidun tomak no labarik sira Anal Polyp ka isin kulit mosu iha anus/sintina fatin, kabun bubu ho grave iha tinan naruk nia laran.Entaun labarik sira ne’ebé mak daudaun halo tratamentu ho hahú tinan 1 to’o 14 anos, sira bele halo konsulta no mós Doutór sira halo screaning tiha komesa aban to’o 11 sira halo operasaun,”nia haktuir.
Iha fatin hanesan, Diretór Of Paediatric Surgery Austrália, Roy Kimble, afirma ekipa sirurjia pediátria sira vizita ba dala-tolu ona, sira mai haree labarik pasiente sira ne’ebé mak sira uluk haree tiha ona no sira kontinua haree pasiente foun.
“Ami hamutuk ho HNGV durante semana rua nia laran halo tratamentu ba labarik sira ne’ebé mak moris mai ho kondisaun mal formasaun, ne’ebé ekipa sirurjia sira ajuda halo tratamentu ba labarik sira no hadi’a fila-fali labarik sira nia kondisaun ho di’ak”, nia afirma
Biban ne’e, nia dehan ekipa sira haree kondisaun ospitál di’ak tebes iha sirurjia nian no lori ekipamentu balun hodi suporta hodi halo tratamentu ba labarik sira.
Entretantu, Inan husi pasiente Elvio Pereira, Madalena da Conçeição, dehan nia-oan Elvio Pereira moris iha loron 2 fulan-Outobru 2015 husi Postu Administrativu Baguia, Munisípiu Baucau, moris mai ho kondisaun normal maibé problema kidun no kabun bubu, nune’e familia deside hodi halo operasaun ba nia-oan.
Notisia relevante:Doutór espesialista Austrália konsulta labarik ibun-sakat 200-resin iha HNGV
Jornalista : Felicidade Ximenes
Editor: Florencio Miranda Ximenes
