DILI, 31 Marsu 2025 (TATOLI)-Institutu Nasionál Estatístika Timor-Leste, Institutu Públiku (INETL, I.P) rejista iha Fevereiru 2025, inflasaun 0,1% iha Índise Presu Konsumidór (IPK) kompara ho fulan-Janeiru iha deflasaun 0,2%.
Tuir dokumentu INETL, mudansa presu grupu hotu sa’e 0,1% tanba hetan kontribuisaun husi grupu hahán no bebida la’ós alkoólika 0,1%, alkoól no tabaku 0,2%, transporte 0,1% no uma 0,1%.
“Grupu hahán no bebida la’ós alkoólika sa’e 0,1% tanba hetan impaktu maioria husi subgrupu foos sa’e 0,4%, ikan no hahán tasi 1,3%, ai-fuan 2,0%, no mina no bokur 0,2%. Subgrupu modo-tahan tun 0,4%, masin-midar, marmelada, bani-been, xokolate no hahán midar 0,5%, susu-been, keiju no manu-tolun 0,5%, kafé, Xá, no kokoa 0,3% no naan 0,1% sai hanesan mudansa kontráriu ba inflasaun grupu hahán no bebida la’ós alkoólika”, nota ne’e informa.
Relasiona ho mudansa persentajen IPK anuál tun 0,2% kompara entre fulan-Fevereiru 2025 ho Fevereiru 2024 hetan kontribuisaun husi grupu transporte tun 2,0%, alkoól no tabaku 1,7%, uma l,6%, no komunikasaun 0,9% ba anuál Fevereiru 2025.
Nune’e grupu hahán no bebida la’ós alkoólika sa’e 0,1%, edukasaun 0,4%, saúde 2,3%, hatais no sapatu 0,4% no rekreasaun no kultura 0,2% sai hanesan mudansa kontráriu ba inflasaun grupu hotu ba anuál Fevereiru 2025.
Kona-ba inflasaun tradeable laiha mudansa 0,0% no non-tradeable sa’e 0,2% iha mensál.
Kompara entre fulan-Fevereiru tinan 2025 ho Janeiru 2025, inflasaun tradeable tun 0,4% no non-tradeable sa’e 0,1% iha anuál.
Notísia relevante: Timor-Leste rejista deflasaun 0,2% iha Janeiru
Jornalista : Arminda Fonseca
Editora : Maria Auxiliadora
