KOVALIMA, 01 Abríl 2025 (TATOLI) – Autoridade Nasionál Petróleu (ANP) liuhusi Dirasaun Downstream, segunda-ne’e, partilla informasaun kona-ba enkuadramentu legál downstream ba autoridade sira hanesan dirijente, administradór, xefe suku no ba xefe aldeia sira, iha munisípiu Kovalima.
“Ita atu disemina enkuadramentu legál ba setór downstream inklui ho regulamentu tékniku sira maske molok ita realiza ona administradór no xefe suku la envolve xefe aldeia maibé tinan ne’e ita envolve mós xefe aldeia sira”, Jerente Jerál Administrasaun Lisensiamentu no Operasaun downstream, Juvencia Costa, dehan ba TATOLI, iha salaun AMC, ohin.
Atividade downstream mós akontese iha aldeia sira nune’e ho atividade ida-ne’e, bele iha koñesementu lisensa no aprovasaun ne’ebé presiza ba atividade retallu sira, nune’e xefe aldeia sira bele halo komunikasaun ba ANP bainhira akontese iha aldeia sira.
ANP partilla enkuadramentu legál dekretu-lei kona-ba setór downstream númeru 1/2012 kona-ba setór downstream ho nia regulamente tékniku sira hanesan regulamentu komersiál importasaun no esportasaun kombustível, armazenamentu kombustível no regulamentu ne’ebé regula postu abastesimentu kombustível regulamentu númeru 1/2013.
Prezidente Autoridade Munisípiu Kovalima, Miguel Armada Cardoso, reforsa katak, prezensa autoridade sira, atu rona informasaun husi Autoridade Nasionál Petróleu (ANP) kona-ba setór downstream (Mina no gás hahú husi refinasaun mina-rai brutu, prosesamentu gás naturál, no distribuisaun produtu petrolíferu sira).
“Ita-nia maluk sira lori sasan mai tanba funsionáriu limitadu la haree ho disemina informasaun ida-ne’e husi postu, suku no aldeia sira presiza atu haree tanba dala ruma mós bele akontese”, nia dehan.
Ho nune’e autoridade fó hanoin atu kumpri lei númeru 1/2012 kona-ba setór downstream, tékniku sira partilla informasaun kona-ba prosesamentu, fornesimentu no seluktan.
Xefe Suku Fohorem Julio Alves agradese ANP tanba bele partilla informasaun ba autoridade hahú husi diretór sira, xefe suku no xefe aldeia sira bele iha koñesementu kona-ba setór downstream. “Nune’e bele fahe tutan ba ami-nia komunidade sira”, nia dehan.
Notísia relevante:ANP introdús prosesu enkuadramentu setór “downstream” ba autotidade Vikeke
Jornalista: Celestina Teles
Editór: Rafael Ximenes de A. Belo
