DILI, 01 Abríl 2025 (TATOLI)–Prezidente ba Grupu Amizade Parlamentár Timor-Leste no Tailándia, Maria Gorumali Barreto, hato’o solidariedade ba Estadu no povu Tailándia no Myanmar, ne’ebé afetadu husi rai nakdoko ho magnitude 7,7.
“Hato’o ami-nia sinsera kondolénsia ho profundu tristeza ba situasaun dezastre ne’ebé akontese rai nakdoko kona Myanmar afeta mai iha Tailándia iha 28 Marsu meudia. Situasaun tráziku ida ne’e halakon ema barak nia vida, estraga uma nomós infraestrutura no lori komunidade moris iha kondisaun ne’ebé susar no terus tanba tenke ses husi sira-nia uma hodi bá hela iha fatin emerjénsia hodi hein situasaun normál,” nia hato’o liuhusi intervensaun iha reuniaun plenária Parlamentu Nasionál (PN), tersa ne’e.
Deputadu Bankada Governu husi Kongresu Nasionál Rekonstrusaun Timorense (CNRT) ne’e, haktuir dezastre ida ne’e rezulta mós ba pasiente sira ne’ebé baixa hela iha ospitál tenke evakua sai husi sala baixa hodi hela iha li’ur ho kondisaun kompletu no ekipamentu médiku ne’ebé iha tempu ne’ebá sira lori sai.
“Situasaun ne’e triste tebes ba ita no ita merese hato’o ita-nia sentidu solidariedade ba sira,” nia hato’o.
Notísia relevante : Timor-Leste manifesta solidariedade ho povu Tailándia no Myanmar
Membru husi órgaun lejizlativu ne’e, apresia IX Governu Konstituisionál ne’ebé deklara lais hodi fó tulun no apoiu ba nasaun viziñu hanesan Tailándia ho Myanmar ne’ebé agora sira moris iha situasaun ne’ebé defísil no situasaun emerjénsia.
Deputada ne’e husu serbisu misaun diplomátika Timor-Leste nian liuhusi Embaixada iha Tailándia tau kontaktu no tau-atensaun ba timoroan lubun iha ne’ebá ne’ebé daudaun hala’o estudu iha nasaun referidu.
Jornalista : Nelson de Sousa
Editora : Julia Chatarina
