KOVALIMA, 02 Abríl 2025 (TATOLI) – Prosesu Implementasaun Projetu Programa Nasionál Dezenvolvimentu Suku (PNDS) iha 2025, iha munisípiu Kovalima, foin tama iha faze aprovizionamentu.
“Ita-nia prosesu tama ona iha faze aprovizionamentu ne’ebé fahe ba étapa sira mak hanesan, prosesu planeamentu, anúnsia informasaun, rejistu fornesedór hodi fó oportunidade ba empreza lokál sira eziste iha postu no iha suku atu hakbesik ba suku ida-idak hahú rejistu”, Diretór PNDS Kovalima, Pedro de Araújo Gomes, hato’o ba jornalista iha nia entrevista iha salaun AMC, ohin.
Notísia relevante:PNDS Kovalima partilla esperiénsia MOP ba funsionáriu sira
Dirijente ne’e esplika katak hafoin halo rejistu, kontinua verifika dokumentu ba empreza lokál ne’ebé submete sira-nia dokumentu ba empreza ne’ebé nia dokumentu kompletu sei halo enkontru kandidatu fornesedór hodi submete pedidu kuotasaun ba empreza lokál sira.
Atu implementa programa PNDS, foin hahú prosesu aprovizionamentu hodi halo rejistu ba empreza lokál sira nune’e PNDS Munisípiu seidauk iha dadus tanba foin hahú halo rejistu direta iha nível suku no ekipa munisípiu ho enjiñeiru munisípiu hodi halo verfikasaun dokumentu PNDS foin bele identifika totál empreza lokál iha postu administrativu sira.
Programa Nasionál Dezenvolvimentu Suku (PNDS) munisípiu Kovalima fó prióridade implementa projetu 31 iha área setorál hanesn Saúde , Edukasaun, Agrikultura, Obra Públika no bee no saneamentu.
Orsamentu implementa ba projetu 31 ne’e hamutuk $ 1,045,713. Husi montante orsamentu ne’e iha infraestrutura aloka $ 923,885.71, orsamentu ba operasionál $ 121,827.29.
Jornalista: Celestina Teles
Editór: Rafael Ximenes de A Belo
