ERMERA, 02 Abríl 2025 (TATOLI)—Prezidente Federasaun Atletizmu Timor-Leste (FATL), Afrânio Xavier Amaral, hateten kampionatu nasionál ba modalidade atletizmu ne’ebé hala’o iha munisipiu Ermera durante loron tolu hahú 02-04 Abríl 2025 ho objetivu atu prepara atleta sira ba jogu Komunidade Nasaun Ko’alia Lian Portugés (CPLP-sigla portugés) no jogu internasionál Sea Games iha Tailándia 2025.
Notísia Relevante: MJDAK aprova ona fundu ba Karate-do no Atletizmu realiza kampionatu nasionál
“Ami agradese ba Governu ne’ebé apoiu ona orsamentu mai ami hodi realiza kampionatu nasionál ida-ne’e iha munisipiu Ermera. Kampionatu nasionál ida-ne’e nia objetivu prinsipál mak prepara hodi hili atleta sira prestasaun di’ak atu tuir jogu CPLP no jogu Sea Games. Ita sei haree atleta seniór sira-ne’ebé iha prestasaun di’ak mak ita hili atu kompete iha Sea Games ne’ebé sei realiza iha Tailándia iha fulan-Dezembru tinan ne’e,” Afrânio hateten ba jornalista sira iha Gleno, kuarta ne’e.
Nia dehan, atu haree atleta sira-nia prestasaun hodi prepara ba eventu internasionál ruma tenke liuhusi kampionatu nasionál.
“Ita atu define atleta ne’ebé mak prestasaun di’ak, dalan mak realiza kampionatu nasionál. Entaun, ita-nia atleta sira-ne’ebé partisipa ohin to’o bainrua ne’e juvenil ho senior. Kada munisípiu ida reprezenta ema na’in-haat (4) kompostu hudi feto rua (2) no mane rua (2), juvenil rua (2) no seniór rua (2), hamutuk ho treinadór ida (1) entaun munisípiu ida ema na’in-lima (5),” Afrânio tenik.
Iha biban ne’e, nia hato’o agradeseimentu ba Prezidente Autoridade Munisípiu (PAM) Ermera, Komandu Polísia Nasionál Timor-Leste (PNTL) no ekipa destakadu FALINTIL-Forsa Defeza Timor-Leste (F-FDTL) ne’ebé fó apoiu másimu, asegura seguransa di’ak tebes ba eventu ne’e no atleta sira-ne’ebé mai husi munisípiu sira-ne’ebé konsentra iha Gleno.
Iha okaziaun ne’e, PAM Ermera José Martinho Soares apresia ba Governu liuliu Munisteriu Juventude Desportu Arte no Kultura (MJDAK) no FATL ne’ebé hola inisiativa di’ak hodi realiza kampionatu nasionál ne’e iha munisípiu Ermera.
“Apresia tebes ba Governu no Federasaun Atletizmu, lori ona desportu mai Munisípiu Ermera. Ida-ne’e atu promove ita-nia oan sira nia talentu iha mundu desportiva ninian. Alin atleta sira kompete ho di’ak, manán mós simu realidade, lakon mós simu realiade tanba atleta husi munisípiu hotu mak kompete iha eventu ne’e,” PAM ne’e dehan.
Iha sorin seluk, reprezentante Ministru MJDAK atuál Diretór Jerál Desportu João Rodrigues hateten, kampionatu nasionál ba atletizmu iha parte rua ne’ebé diferensa tanba atu halo selesaun ba atleta sira-ne’ebé atu prepara ba jogu CPLP no Sea Games.
“Kampionatu nasionál ba atleta atletizmu ita halo iha buat rua ne’ebé diferensa, ita hodi halo selesaun ba atleta sira atu kompete eventu importante rua (2) mak ida jogu CPLP no ida mak Sea Games, nune’e mak Governu apoiu másimu ba sira,” João dehan.
Tuir diretór ne’e, bainhira realiza ona kampionatu nasionál ne’e mak foin bele identifika loloos atleta sira-ne’ebé mak iha kualidade no merese hili ba kompete jogu internasionál rua (2) ne’e.
Ba ativiade durante loron tolu (3) ne’e realiza tanba hetan apoiu orasamentu hamutuk $22.000. Eventu ne’e, hala’o ho kompetetivu tebes husi atleta munisípiu hotu no partisipa másimu husi estudante hotu iha Gleno no komunidade Ermera.
Notísia Relevante: MJDAK apoiu $22.000 ba FATL realiza kampionatu nasionál
Jornalista : Hortencio Sanchez
Editór : Cancio Ximenes
