DILI, 01 Abríl 2025 (TATOLI)—Diretór Nasionál Desportu Federadu Ministeriu Juventude Desportu Arte no Kultura (MJDAK), Oscar Dias Quintas, hateten iha tinan 2025 Governu apoiu $22.000 ba Federasaun Atletizmu Timor-Leste (FATL) hodi realiza kampionatu nasionál atu hili atleta ne’ebé prestasaun di’ak hodi prepara ba selesaun nasionál no jogu Komunidade Nasaun Ko’alia Lian Portugés (CPLP-sigla portugés).
“Ita apoiu ba modalidade desportiva sira, maibé atletizmu ita apoiu $22.000 ba sira hodi hala’o kampionatu nasionál,” Diretór Oscar hateten ba Agência TATOLI iha edifisiu MJDAK Lecidere Dili, tersa ne’e.
Iha sorin seluk Prezidente FATL Afrânio Xavier Amaral hateten, kampionatu nasionál sei realiza iha kapitál Gleno, munisípiu Ermera.
“Kampionatu nasionál ita hetan apoiu husi Governu. Kampionatu nasionál ne’e sei halo abertura iha loron 02 fulan-Abríl to’o loron 04 fulan-Abríl. Atleta sira juniór no seniór sei mai husi Munisípiu sira hotu,” nia dehan.
Nia dehan, iha kampionatu nasionál ne’e atleta sira sei kurida husi metru 800 to’o 10.000 ba klase seniór feto no mane, enkuantu klase juniór sei kurida iha metru 100 to’o 3000 no atleta ne’ebé kompete besik 100.
Jornalista : Hortencio Sanchez
Editór : Cancio Ximenes
