DILI, 07 Abríl 2025 (TATOLI) – Ministériu Transporte no Komunikasaun (MTK), Ministériu Planeamentu no Investimentu Estratéjiku (MPIE) no tékniku husi empreza Alcatel Sumbarine Network (ASN) halo ona teste, iha fulan kotuk, ba kabu submarinu fibra ótika (ligasaun internasionál) iha cable landing station Bebonuk Dili.
Diretór Nasionál Infraestrutura no Komunikasaun, Ambrosio Amaral, hateten kabu koneksaun ba ekipamentu Submarine Line Terminal Equipment (SLTE) ne’e monta ona haat – rua iha Bebonuk, ida iha Darwin no seluk iha Porthealand.
Nia esplika katak ekipamentu rua iha Bebonuk ne’e nia funsaun atu konekta direta bá Darwin no ida konekta direita bá Porthealand, ne’ebé teste sira ne’ebé halo nia rezultadu di’ak.
Daudaun tékniku na’in-ualu, rua husi Ministériu Planeamentu no Investimentu Estratéjiku no neen husi MTK tuir hela formasaun etapa dahuluk nian ka B1, ne’ebé formasaun ne’e sei ramata iha semana ne’e. Formadór ne’e mai husi empreza ASN husi Fransa nian.
Matéria ne’ebé téknkiu sira tenke apreende mak kona-ba koñesimentu operasionál nian, hanesan ba ekipamentu, kabu, power no seluk tan.
Formasaun ne’e kontinua la’o to’o finál, tanba kona-ba koñesimentu sistema operasionál ne’é hahú husi B1, B2 to’o B3. “Ida-ne’e ko’alia kona-ba sistema operasionál nian, ne’ebé buat hotu la’o ho tuir etapa pur etapa”.
Nia subliña katak kona-ba preparasaun atu jere kabu ne’e desizaun polítika nian, tanba sei harii empreza estatál ida mak jere no prosesu agora la’o hela iha nivel polítika nian.
“Tékniku ami la’o nafatin, tanba importante ba ami mak atu empreza iha ka laiha mós teste halo ona no formasaun ka treinamentu sira mós la’o. Bainhira hotu, fibra ne’e tenke la’o tanba atu teste ba ready for service ne’e, sei halo teste ba ajénsia Governu sira, automatikamente la’o iha meadu tinan ne’e”, nia haktuir.
Tuir kontratu ne’ebé Governu halo ho empreza ASN, instalsaun ba kabu fibra ótika iha data limitasaun ne’ebé halo hand over iha tinan ne’e, tarde liu Juñu ka Maiu.
Notísia relevante: Teste ba kabu fibra ótika ligasaun internasionál iha Bebonuk adia
Jornalista: Arminda Fonseca
Editora: Maria Auxiliadora
