VIKEKE, 07 Abríl 2025 (TATOLI)—Prezidente Autoridade Munisípiu (PAM) Vikeke, Francisco Cruz Simões de Gonzaga Soares, informa, nia parte ho ekipa forma ona ekipa konjuta Toponímia iha munisípiu Vikeke hodi hala’o serbisu husi Sekretaria Estadu Asuntu Toponímia no Organizasaun Urbana (SEATOU).
“Foin lalais vizita SEATOU mai Vikeke atu entrega serbisu lubuk ida ba ita. Nune’e, forma ona ekipa konjunta ne’ebé kompostu husi liña ministeriál iha munisípiu Vikeke hodi kontinua serbisu sira-ne’ebé SEATOU husik hela ba ita hodi identifika no halo levantamentu ba uma afetadu projetu estrada públiku no organiza negosiante sira bá merkadu tuan,” PAM Vikeke hateten durante sermónia isar bandeira, iha resintu administrasaun Vikeke, segunda ne’e.
Notísia relevante : SEATOU husu povu Vikeke koopera ho Governu ba alargamentu espasu públiku
Ekipa konjunta sei halo identifikasaun ba uma afetadu sira-ne’ebé foin lalais ekipa SEATOU halo markasaun husi estrada semitériu Públiku Beloi to’o merkadu Vikeke Vila.
“Ha’u haree ekipa Toponímia Vikeke horisehik domingu (06/04), Diresaun Jestaun Merkadu hahú halo sira-nia serbisu atu koordena ita-nia negosiante sira iha Vikeke Vila,” nia akresenta.
Iha fatin hanesan, Diretór Servisu munisipál Jestaun Merkadu, Mirandolina de F. Guterres, hateten, Jestaun Merkadu halo ona identfikasaun ba negosiante hamutuk na’in-108, ne’ebé iha tempu badak sei muda provizóriu ba merkadu antiga iha postu Vikeke Vila.
“Ami halo ona identifikasaun ba negosiante sira-ne’ebé fa’an iha trotoár leten no dalan ninin. Ami halo ona koordenasaun ho sira hodi muda provizória bá merkadu tuan nia laran, depois ita-nia merkadu Olobai reabilita hotu maka muda fali bá merkadu Olobai. Muda ita-nia negosiante sira bá merkadu tuan ne’e sira kolabora tebes ho ami, ne’ebé balun komesa muda ona bá merkadu tuan nia laran,” nia katak.
Diretór ne’e dehan, ekipa konjunta kontinua akompaña ba oin negosiante sira sei labele fa’an sasán iha dalan ninin tanba okupa espasu públiku.
Jornalista : Vitorino Lopes da Costa
Editora : Julia Chatarina
