OEKUSI, 09 Abríl 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Sekretária Rejionál Agrikultura hakiak manu-rade hamutuk 1000 iha suku, Lifau sub-rejiaun Pante Makasar, ba futuru bele fornese ba programa merenda eskolár iha eskola sira iha Oekusi.
“Programa haki’ak manu-rade ne’e, atu ita bele hetan manu-tolu barak hodi aproveita tau ba merenda eskolár, atu apoia eskola sira iha Oekusi, sira-ne’ebé ita haree katak bele fó manu oan entaun ita sei iha mákina ida naran inkubadora atu lu’ut manu-tolu sira, liu loron 21 de’it, manu-rade oan sira moris ona, sei ita hakarak halo manu-rade barak mak manu-tolu mós sei barak. Nune’e eskola sira ita bele fornese,” Prezidente Autoridade RAEOA, Rogério Lobato, informa, bainhira hala’o observasaun ba fatin manu-rade iha Lifau, tersa ne’e.
Notísia relevante:Autoridade RAEOA oferese manu-rade 100 ba grupu komunidade iha Pante Makasar
Iha fatin hanesan, Diretór Diresaun Rejionál Agrikultura, Amaro Efi, informa programa haki’ak manu-rade ne’e ho intensaun atu rezolve programa rua hanesan mak merenda eskolár no mós má-nutrisaun iha Oekusi.
“Manu-rade 1000 ne’e ita sei fahe ba rua hanesan 500 tau ketak hodi halo selesaun, ida-ne’ebé mak atu fó tolun no balun lori ba merkadu, ba oin ita sei halo pedidu atu servisu hamutuk ho parte edukasaun no saúde nian, nune’e bele forrnese ba merenda eskolar no mós fó benefisíu mós ba kazu má-nutrisaun tanba daudaun ne’e Oekusi infrenta problema má-nutrisaun,” nia dehan.
Entretantu, João da Costa, nu’udar lia-na’in iha suku Lifau, nu’udar mós na’in ba grupu haki’ak manu-rade ne’e, konsidera programa haki’ak manu rade ne’e importante, nune’e bele responde mós nesesidade komunidade sira bainhira presiza atu haki’ak.
“Ha’u kontente tanba ita iha rai tenke investe, sekarik Governu iha polítika di’ak, ha’u nu’udar rai-na’in koopera tanba ne’e ba nesesidade ema barak nian, ne’e mós foin hahú jere husi sidadaun estranjeiru maibé ba oin ha’u sei ko’alia ho autoridade, presiza akordu ida atu fó de’it servisu ba ha’u-nia oan sira, tanba rai ne’e ha’u-nia, ha’u la husu buat ida importante fó servisu ba ha’u-nia oan,” nia katak.
Entretantu, programa haki’ak manu-rade realiza tanba hetan apoia téknika husi nasaun Filipana liuhusi kooperasaun ho Sekretária Rejionál Agrikultura no daudaun ne’e sei jere husi sidadaun Filipina sira no tuir planu.
Tuir planu hafoin grupu haki’ak manu-rade ne’e husi Filipina jere to’o tinan ida, sei entrega ba Governu husi jere rasik investimentu ne’e, aliende haki’ak manu rade no mós sei hakiak mós fahi iha fatin referida.
Notísia relevante:Ekipa Saúde observa merenda eskolár iha EBF 30 Agostu Masin falta ijiene
Jornalista: Abílio Elo Nini
Editór: Florencio Miranda Ximenes
