KOVALIMA, 09 Abríl 2025 (TATOLI) – Sekretariu Estadu Asuntu Toponímia no Organizasaun Urbana (SEATOU), Germano Santa Brites, esplika serbisu no kompeténsia SEATOU nian ba komunidade iha postu administrativu Zumalai, munisípiu Kovalima.
“Atu hateten katak administrativamente, territóriu ne’e iha Estatál nia liman, servisu SEATOU nian bazeia de’it ba Dekretu-Lei númeru 3/2024, loron 17 Janeiru, primeira alterasaun husi Dekretu-Lei núneru 33/2008, loron 27 fulan-Agostu, kona-ba ijiene no orden públika”, Germano hateten ba komunidade sira iha ámbitu sosializasaun no konsulta públika ba família afetada ba konstrusaun autoestrada husi Zumalai bá Natarbora.
Nia dehan serbisu ne’ebé SEATOU halo la’ós ba aan-rasik, ba membru Governu, grupu balun no partidu polítika. “Ida-ne’e mak ita-boot sira akompaña barak liu iha Dili, ita halo serbisu ba ema hotu, halo ba ema riku, ema natoon, ema ki’iak no ki’ik liu sira. Ita la haree ida ne’e, lei ne’e hateten servisu ba-loos, mai-loos”, Germano afirma.
Nia lembra katak, tinan kotuk, SEATOU esplika ona nia knaar sira ba populasaun iha Suai Vila no agora kontinua iha Zumalai, hodi salienta katak SEATOU nia prezensa la’ós atu ameasa komunidade.
“La’ós mai atu baku, la’ós mai lori forsa polísia atu duni komunidade sira sai. Ita mai ho mekanizmu, iha etapa tolu to’o etapa haat. Primeiru ita mai sosializa, depois notifika, notifika primeiru loron 30, notifika segundu loron 10, kuandu la kumpre mak SEATOU foin halo asaun. Se ita-boot sira kumpre notifikasaun sobu rasik imi-nia sasán, ami koopera no prontu fasilita, se la kumpre, makina tama sobu, ida ne’e de’it”, governante ne’e akresenta.
Nune’e, nia husu ba komunidade Zumalai atu koopera ho Governu hodi realiza programa konstrusaun autoestrada ne’e, tanba dezenvolvimentu ne’ebé sei mai husik hela ba jerasaun foun sira mak goza.
“Se ita-boot sira la koopera, ami sei mai tan dala ida. ha’u rasik mak sei mai ida ikus nian. Maibé loron hira tan ami nia ekipa ida sei mai sosializa lei, ne’ebé hau temi ona ne’e ba imi, nune’e implementasaun iha terRenu karik bele komprende hodi koopera”, nia konklui.
Ekipa interministeriál ne’ebé envolve iha programa sosializasaun no konsulta públika ne’ebé realiza hahú husi Kovalima, Manufahi, Ainaru no Natarbora mak hanesan MPRM-Timor GAP, E.P, ministériu sira mak hanesan Administrasaun Estatál (MAE), Planeamentu no Investimentu Estratéjiku (MPIE), Justisa (MJ), Obra Públika (MOP), Agrikultura, Pekuária, Peska no Floresta (MAPPF), Juventude Desportu no Kultura (MJDK) no Interiór (MI).
Notísia relevante: Sosializasaun no konsulta públika iha Zumalai, MPRM husu komunidade kontribui
Jornalista: Hortencio Sanchez
Editora: Maria Auxiliadora
