KOVALIMA, 09 Abríl 2025 (TATOLI) – Prezidente Timor GAP, Empreza Públika, Rui Soares, hateten Governu iha osan atu responde ba Corporate Social Responsibility (CSR) ka Responsabilidade Sosiál Korporativa bainhira projetu konstrusaun autoestrada ne’e komesa.
CSR nia objetivu mak bainhira projetu autoestrada ne’e la’o, komunidade barak mak afeta ba impaktu ambientál ba konstrusaun referidu, nune’e empreza konstrutora no Timor GAP sei asegura.
“Hanesan empreza estatál ami iha obrigasaun ida atu halo ida-ne’e, maibé ita sei haree projetu ba projetu. Ita kontrata ona kontraktór haree saida mak ita halo husi proposta hirak ne’ebé kontraktór hato’o mai atu halo buat ne’ebé fó benefísiu ba komunidade”, Rui Soares hateten iha ámbitu sosilaizasaun no konsulta públika ho komunidade afetada sira kona-ba Projetu Konstrusaun Autoestrada iha Zumalai.
Kona-ba CSR nia implementasaun iha mekanizmu barak no depende ba komunidade sira-nia ezijénsia, tanba iha projetu boot tenke iha CSR hodi trata komunidade sira ho dignu.
Kona-ba orsamentu hira mak tau ba CSR seidauk bele fó sai nia montante, tanba projetu ne’e daudaunn sei iha faze konkursu públiku. Bainhira konklui mak halo kalkulasaun ba komunidade afetada hodi define nia montante.
Lembra katak, iha 07 Marsu 2025, Konsellu Ministru autoriza Ministériu Petroleu no Rekursu Minerál (MPRM) halo despeza relasiona ho programa kona-ba implementasaun Projetu Tasi-Mane iha Kosta Súl nasaun nian ho montante $40.500.000.
Notísia relevante: Sosializasaun no konsulta públika iha Zumalai, MPRM husu komunidade kontribui
Jornalista: Hortencio Sanchez
Editora: Maria Auxiliadora
