KOVALIMA, 09 Abríl 2025 (TATOLI) – Ministru Petróleu no Rekursu Minerál (MPRM), Francisco Monteiro, hateten Governu prevee orsamentu, iha 2025, hodi halo manutensaun ba autoestrada segmentu dahuluk iha Suai-Kovalima ne’ebé danifika kauza husi dezastre naturál iha tinan sira bá kotuk.
“Autoestrada segmentu primeiru, balun kondisaun aat tanba impaktu husi dezastre naturál. Nia prosesu tama ona iha Fundu Infrastrutura, nune’e iha tinan ne’e ita sei lansa konkursu ida iha hodi halo manutensaun”, Francisco Monteiru hateten ba jornalista sira iha Zumalai, kuarta ne’e.
Nia dehan daudaun ne’e ekipa husi ministeiru reavalia kona-ba dezeñu anteriór autoestrada nain atu halo manutensaun no aumenta tan drainajen iha estrada ninin, nune’e bee suli tuir nia dalan.
“Nia orsamentu ba manutensaun ami prevee iha Fundu Infrastrutura mais ou menus millaun $5 to’o $10, maibé iha konkursu mak ita foin haree loloos nia kustu ne’e hira”, nia adianta.
Relembra katak autoestrada Suai liga bá Fatukai, Zumalai, ho nia naruk kilómetru 30, ne’ebé gasta osan millaun 304, konstrui husi empreza internasionál China Overseas Engeneering Grup (COVEC).
Antes ne’e, Governu liuhusi antigu Ministru Obra Públika, Gastão de Sousa, no antigu Ministru Petróleu no Rekursu Minerál, Alfredo Pires, lansa asinatura konjunta faze dahuluk nian ba projetu konstrusaun autoestrada husi Suai to’o Beasu-Vikeke, iha loron 25 Janeiru 2013, iha sala konferénsia Timor GAP, iha Timor Plaza, Díli.
Projetu autoestrada ne’e tuir dezeñu, ninia naruk kilómentru 30 no luan metru 25, ninia konstrusaun sei halo iha faze haat; dahuluk husi Suai bá Fatukai, daruak husi Fatukai bá Betano, datoluk husi Betanu bá Natarbora no dahikus husi Natarbora bá Beasu-Vikeke, maibé ikus tenke kansela Vikeke no muda ba iha Natarbora.
Notísia relevante: PAM Covalima aprezenta kestaun tolu ba Ministru Petróleu
Jornalista: Hortencio Sanchez
Editora: Maria Auxiliadora
