Falta metru ida-resin, korrente Bee-mota atu sobu EBF Madebau

BOBONARU, 10 Abríl 2025 (TATOLI)—Udan-boot ne’ebé akontese hahú husi domingu (06 Abríl) to’o kuarta (09 Abríl) ne’e, hatudu korrente bee-mota ne’ebé suli makaas fó ameasa no atu sobu edifísiu Eskola Ensinu Baziku Filiál (EBF) Madebau, tanba espasu rai mamuk entre mota no eskola falta ka hela de’it metru ida-resin.\

Notísia Relevante: ME presiza rezolve kondisaun EBF Madebau

Koordenadór Eskola Ensinu Baziku Filiál (EBF) Madebau, suku Atabae, postu administrativu Bobonaru, munisípiu Bobonaru, Bruno Babo, hateten foin lalais ne’e korrente bee-mota ne’ebe suli-tebe makaas konsega sobu no lori tiha portaun ho lutu-rede ne’ebé harii ho fundu husi programa ‘Hafurak Eskola’ inklui dapur merenda eskolár.

“Agora, ami-nia eskola ne’e grave, rede no dapur sira bee-mota lori ba hotu, hela metru ida-resin atu tama liu ba eskola. Udan-boot mai loron ida-rua tan bele to’o ona eskola, haree mak ai-hun boot ne’e de’it ona,” Nia informa ba Agência Tatoli, liuhusi telefónika, kinta ne’e

Koordenador ne’e hatutan, daudaun ne’e prosesu ensinu no aprendizajen sei kontinua la’o normál maibé iha tempu udan monu rai ne’e, estudante no manorin sira tauk no sente la seguru tanba eskola ne’e konstrui iha mota ninin.

Tanba ne’e, nia rekomenda ba Governu liuliu Ministériu Edukasaun atu tau-atensaun ba problema ne’e ho imediata.

“Se bele mai haree ho matan ba eskola Filiál Madebau grave tebes ka lae, ami ezije mak ida ne’e,” nia dehan.

Superintendente Diresaun Servisu Munisipál Edukasaun (DSME), Autoridade Munisípiu Bobonaru, Noemia da Silva Manuel Leite, rekoñese problema ne’e sériu tanba ne’e DSME munisípiu Bobonaru orienta ona Inspetór Eskolár buka meiu atu asegura estudante sira-nia vida no fasilidade eskolár iha fatin seguru.

“Inspetór iha meneira ida, servisu hamutuk ho komunidade no autoridade lokál halo limpeza iha rai ne’ebé komunidade entrega ona ba eskola atu halo eskola, maibé tanba seidauk iha projetu ida. Ne’ebé, komunidade ho xefe suku Atabae, sira servisu hamutuk hamoos ona fatin ne’e, karik mota sobu ona eskola ne’e mak sira sei harii uma provizóriu ida atu nune’e estudante sira bele utiliza halo ensinu no aprendizajen,” nia dehan.

Responsavél Servisu Inespesaun ne’e mós afirma, Diresaun Servisu Munisipál Edukasaun, Autoridade Munisípiu Bobonaru mós sei hato’o relatóriu ba Ministériu Edukasaun atu rezolve problema ne’e imediata.

“Ida-ne’e, ita ko’alia kona-ba seguransa ba labarik sira-nian, tanba sira-nia kondisaun ameasadu hela husi desastre naturál. Bee-mota mai sobu kuaze moru ba hotu ona no hela de’it metade, la to’o metru ida, ha’u hanoin bee-mota bele sasurut eskola ne’e hotu,” nia hateten.

Enkuantu, tuir dadus, eskola EBF Madebau ne’ebé konstrui iha 2009 liuhusi programa Pakote Referéndu ne’e, ho totál estudante hamutuk na’in-74 no manorin hamutuk na’in-haat (4).

Notísia Relevante: ME sei konstrui-reabilita eskola 15 iha Bobonaro inklui EBC Tapo

Jornalista : Sérgio da Cruz

Editór        : Cancio Ximenes