DILI, 12 Abríl 2025 (TATOLI)—Membru Organizasaun Mundiál g7+, sábadu ne’e, eleje Ministru Negósiu Estranjeiru husi Illa Salomaun, Peter Shanel Agovaka, lidera g7+ ba períodu 2026-2028. Entretantu, eleje mós Vise-Ministru Negósiu Estranjeiru Repúblika Demokrátika Kongo, Gracia Yamba Sazadi, nu’udár Primeiru Vise-Prezidente no Vise-Ministru Negósiu Estranjeiru Libéria, Jeddi Mowbray Armah, sai Segundu Vise-Prezidente.
“Purtantu, iha kombinasaun ne’ebé mak perfeita. Tuir rejiaun pasífika mak agora hetan oportunidade ka asume kargu ida-ne’e hanesan Prezidente, depois husi rejiaun Áfrika, Repúblika Sentrál Demokrátiku Kongo mak asumi Vise-Prezidente no mós Libéria,” Sekretáriu Jerál g7+, Helder da Costa, dehan hafoin reuniaun 6a Reuniaun Inter-ministeriál g7+ ne’ebé hala’o durante loron rua, 11-12 Abríl 2025, iha Otél Palm Spring, Fatuhada, Dili.
Nia esplika, hili nível Ministru Negósiu Estranjeiru lidera organizasaun referida tanba diplomásia, enkuadramentu g7+ nian no hanesan membru nasaun sira diskute katak iha asuntu barak liu mak ligasaun ho Ministru Negósiu Estranjeiru nia kna’ar iha nível internasionál.
Helder informa katak prosesu selesaun ba líder g7+ ne’e bazeia ba karta ne’ebé deklara ona iha g7+ katak hili mós Vise-Prezidente rua tanba nasaun Áfrika ne’e boot, maioritariamente membru g7+ ne’e bazeadu iha Áfrika.
“Membru nasaun 14 mak bazeadu iha Áfika, enkuantu husi nasaun neen ne’e iha Ázia, iha Pasífiku no mós iha Karibia,” nia hatutan.
Nia mós hateten hili Vise-Prezidente na’in-rua nesesitadu tebes hodi partisipa iha reuniaun internasionál sira tanba daudaun ne’e krize barak-barak no ministru ida mesak labele kobre hotu.
Notísia relevante: Konferénsia ministeriál g7+ ne’ebé realiza iha TL atu haree progresu-dezafiu
Nia espresa, orgullu ida ba Timor-Leste, tanba reuniaun ne’ebé partisipa husi líder nasionál sira hahú husi Prezidente Repúblika, Prezidente Parlamentu Nasionál, Primeiru-Ministu, membru Governu no mós entidade tomak la’o ho susesu boot.
Helder akresenta katak iha reuniaun ida-ne’e la’ós de’it hili Prezidente no Vise-Prezidente foun, maibé marka mós momentu istóriku ba selebrasaun loron Aniversáriu g7+ ba dala-15.
Entretantu, Prezidente Eleitu g7+, Peter Shanel Agovaka, hato’o agradesimentu tanba bele eleje nia sai líder topu ba organizasaun ne’e no komprometidu servisu hamutuk atu konkretiza misaun no vizaun g7+.
“Kna’ar ida-ne’e hanesan orden foun mai ha’u atu lidera organizasaun ne’e, hodi kontinua hala’o misaun tuir objetivu ne’ebé iha ona,” Prezidente ne’e espresa.
Líder ne’e informa, objetivu harii g7+ atu kria dezenvolvimentu pás no estabilidade.
Iha biban ne’e, Prezidente Sesante g7+, Kenyeh Baleh, hateten nu’udár nasaun Sierra Leone ne’ebé lidera g7+ durante tinan-15, hakarak hanoin foun iha organizasaun.
Notísia relevante: Reuniaun inter-ministeriál g7+: Harii futuru ne’ebé dame no reziliénsia
“Ita hakarak iha hanoin ne’ebé foun iha organizasaun no hakarak konvida liután nasaun barak. Ita presiza demokrasia ne’ebé di’ak hodi kontinua eleva hanoin foun ba organizasaun ida-ne’e ba futuru ne’ebé di’ak,” nia subliña.
Konferensia ministeriál g7+ ne’e Timor-Leste mak sei sai hanesan uma-na’in hodi halibur nasaun membru sira hotu husi Áfrika, Médiu Oriente, Pasífiku no seluk tan.
Vizaun no misaun g7+ mak promove pás no dezenvolvimentu, harii pás no harii Estadu iha nasaun membru sira hotu, no oinsá mak bele asegura efikasia asisténsia esterna ne’ebé buras.
Estadu Membru grupu g7+ hamutuk nasaun 20 ne’ebé kompostu husi Afganistaun, Burundi, Repúblika Sentrál Afrikana, Chad, Comoros, Cote Dívoire, Repúblika Demokrátika Congo, Guiné Bissau, Haiti, Libéria, Papua Nova Guinea, São Tomé e Príncipe, Sierra Leone, Solomon Islands, Somália, Sudaun Súl, Timor-Leste, Togo no Yemen.
Jornalista: Alexandra da Costa
Editór: Xisto Freitas da Piedade
