DILI, 15 Abríl 2025 (TATOLI)—Vise-Ministru ba asuntu Parlamentár, Adérito Hugo da Costa, hateten, mídia estatál Agência Noticiosa de Timor-Leste, Institutu Públiku (Agência Tatoli, I.P) no Rádiu Televizaun Timor-Leste, Empreza Públika (RTTL, E.P) iha papél importante hodi fó sai informasaun loloos ba públiku.
“Prezensa Tatoli no RTTL atu fó informasaun notísia loloos, ein nome Estadu no povu, tanba iha Naktuka ne’e povu la’ós Oekusi de’it, maibé povu Timor laran tomak,” Vise-Ministru hateten hodi responde preokupasaun Deputadu opozisaun sira-nia iha reuniaun plenária, Parlamentu Nasionál (PN), segunda ne’e.
Notísia relevante : Deputadu CNRT apresia Agência Tatoli nia kobertura kona-ba situasaun iha Naktuka
Nia konsidera mídia estatál rua ne’e iha papél importante.
“Se buat ne’e sai preokupasaun povu maioria nian RTTL no Tatoli toba de’it ne’e sala, no ba ko’alia ho responsável sira iha kraik terrenu ko’alia ho Komandante Polísia Unidade Fronteira no agrikultór sira para hatene buat loos iha terrenu, agora ne’e sala nafatin ita hakarak lori saida, ajénsia ne’e mak kredível ko’alia buat loloos,” nia akresenta.
Entertantu, iha reuniaun plenária kontinua iha pro no kontra husi Deputadu FRETILIN no CNRT kona-ba notísia ne’ebé fó sai iha mídia estatál rua, liuhusi publikasaun jornalista destakadu Oekusi, kona-ba situasaun iha Naktuka.
Husi parte Deputadu CNRT nian apresia ho informasaun ne’ebé mídia estatál rua ne’e fó sai kona-ba situasaun atuál iha Naktuka maibé parte Deputadu Opozisaun FRETILIN preokupa notísia ne’ebé fó sai la kobertura to’o fatin ne’ebé iha problema, tanba ne’e informasaun ne’ebé sai di’ak.
Antes ne’e mós iha reunaun plenária kestaun hanesan Deputadu husi Bankada Governu CNRT no Deputadu Bankada Opozisaun FRETILIN hato’o ona kestaun hanesan.
Jornalista : Nelson de Sousa
Editora : Julia Chatarina
