DILI, 08 Abríl 2025 (TATOLI)–Deputadu Bankada Governu husi Kongresu Nasionál Rekonstrusaun Timorense (CNRT), Firmino Taeki, apresia ho jornalista Agência Tatoli, Institutu Publiku (Agência Tatoli, I.P) nia kobertura iha terrenu ne’ebé fó sai informasaun ho loloos ba públiku kona-ba situasaun iha Naktuka.
“Agradese no fó parabéns ba Rádiu Televizaun Timor-Leste, Empreza Públika no Agência Tatoli, I.P ne’ebé tun direta hodi halo entrevista ho komunidade iha fronteira Naktuka, ne’ebé durante ne’e dehan problema hela, husu direta ba sira hodi deklara duni durante ne’e laiha ameasa ba sira, ne’ebé sira halai natar nafatin,” nia hato’o liuhusi intervensaun iha reuniaun plenária, Parlamentu Nasionál (PN), tersa.
Notísia relevante : Abitante Naktuka halo servisu agrikultura la’o normál
Nia konsidera, ida-ne’e mak lia loos hodi fó sai informasaun kona-ba populasaun iha ne’ebá, ne’ebé moris ho situasaun hakmatek.
Deputada Bankada Opozisaun husi Frente Revolusionária de Timor-Leste Indepedente, Mariquita Soares, dehan, kobertura ne’e la to’o bá rai Naktuka ne’ebé iha problema.
Antes ne’e, Primeiru-Ministru, Kay Rala Xanana Gusmão hala’o vizita bá Naktuka iha inisíu Marsu 2025, ne’ebé iha momentu ne’ebá halo mós halo diálogu ho abitante lokál hodi husu atu promove kooperasaun no rekonsialisaun ho komunidade iha Amfoan, Nusa Tenggara Timur, Indonézia.
Notísia relevante : Opozisaun husu Governu rezolve fronteira terrestre ho Indonézia tuir istória
Daudaun ne’e, Polísia Patrullamentu Fronteira (UPF) no Santgas-Pamtas kontinua halo patrullamentu no koordenasaun iha área Naktuka hodi garante seguransa iha liña fronteira.
Jornalista : Nelson de Sousa
Editora : Julia Chatarina
