BOBONARU,15 Abríl 2025 (TATOLI)—Governu liuhusi Prezidente Autoridade Munisípiu (PAM) Bobonaru, Alexandre Pires, ho Prezidente Komité Planeamentu no Reponsabilidade (KPR), tersa ne’e, selebra akordu Subvensaun Públika no Akordu Implementasaun Projetu Programa Nasionál Dezenvolvimentu Suku (PNDS) tinan fiskál 2025.
Prezidente Autoridade Munisípiu (PAM) Bobonaru, Alexandre Pires, husu ba KPR sira atu asume reponsablidade ne’e ho di’ak hodi kontrola implementasaun projetu, nune’e bele la’o ho susesu tanba povu iha suku presiza tebes dezenvolvimentu.
Notísia Relevante: Orsamentu 2025 ba PNDS Bobonaro labele kobre hotu suku 50
“Ha’u tau esperansa tomak no ha’u komvida maluk sira ho sentimentu ida katak ita mesak Bobonaru-oan, ita mesak na’in ba rai ida-ne’e, hakarak ka lakohi, dezenvolvimentu tenke la’o. La’ós ba ita de’it, ba ita-nia oan sira-ne’ebé ita hahoris hela. Maluk sira, se imi la kontrola projetu abandona, atraza, imi mak sei sofre. Entaun, tau buat hotu-hotu iha kotuk, ita mai ho vizaun ida katak ita hotu-hotu kontribui fó liman ba malu atu halo dezenvolvimentu,” Nia hateten iha salaun Maria-Tapo
Nia husu mós komunidade atu koopera ho ekipa PNDS, nune’e obra ne’e bele finaliza ho rezultadu ne’ebé mai ho kualidade.
Aleinde ne’e, komunidade halo kontratu ho KPR sira labele husu osan makaas liu alvu tanba projetu ne’e implementa atu dezenvolve suku.
“Importante mak kualidade. Ne’e imi kontratu karik labele husu osan makaas-liu, tanba imi hetan rendimentu dobru husi projetu ne’e. Ida mak imi hetan osan, ida tan fali obra ne’e finaliza ita-boot sira mak sei uza ba-mai,” nia dehan.
Diretór PNDS munisípiu Bobonaru, Rosario Mali, esklarese asina kontratu KSP no akordu AIP ne’e importante tebes atu parte rua iha konkordánsia ba implementasaun projetu ne’e bele la’o ho susesu.
Ida-ne’e la kontra matadalan PNDS liuliu iha ezekusaun orsamentu no implementasaun fiziku ne’ebé hetan partisipasaun no ienvolvimentu husi komunidade lokál sira hanesan feto ho mane, Ema ho Difisiénsia (EhD) no ferik-katuas sira hodi atinje meta PNDS nian katak harii relasaun besik entre Governu ho suku.
Nia esplika, tinan ne’e Servisu Munisipál Apoia PNDS hetan alokasaun orsamentu hamutuk miklaun $1,817,733 no husi montante ne’e millaun $1,635,597 (90%) aloka ba Infraestrutura no rihun $181,733 (10%) aloka ba operasionál no orsamentu hirak ne’e hodi finansia ba projetu hamutuk 50.
“Subsidiu infraestrutura utiliza ba materiál fabrikadu, materiál non-fabrikadu, servisu espesifiku, ekipamentu transportasaun no insentivu ba trabalhadór ba konstrusaun no reablitasaun, estensaun ba konservasaun, manutensaun ka reparasaun infraestrutura kiik sira iha nivél suku no subsidiu operasionál, ita sei utiliza enkontru ho komunidade, formasaun, kustu administrasaun no insentivu ba estrutura suku, ” nia dehan.
Enkuantu projetu PNDS 50 ne’e klasifika ba setór sira hanesan dalan, ponte no kontrolu Seias hamutuk 35, setór Bee-Moos neen (6), Saúde haah (4) no setór Edukasaun lima (5).
Notísia Relevante: Bobonaru prevee millaun $26-resin iha proposta OJE 2026
Jornalista : Sergio da Cruz
Editór : Cancio Ximenes
