DILI, 16 Abríl 2025 (TATOLI)- Komandu Jerál Polísia Nasionál Timor-Leste (PNTL) liuhusi Komandante Operasaun Nasionál hatun ona diretiva operasaun hodi fó ordén ba Komandu Munisípiu sira inklui Komandu Unidade sira atu koloka membru hodi fó seguransa másimu durante selebrasaun santa páskua, nune’e sarani katólika sira bele tuir misa semana-santa ho di’ak.
Santa Páskua mak festa boot liu hotu iha fiar sarani, ne’ebé tinan-tinan fó-hanoin ba ita Na’i Jezús Kristu nia moris-hi’as liuhosi mate iha krús.
Notísia relevante:PNTL Baukau garante seguransa durante semana-santa
“Ohin hakarak informa ba komunidade sira iha Timor-Leste laran tomak katak Polísia Nasionál Timor-Leste halo esforsu hotu- hotu atu garante seguransa no orden públika iha períodu festa páskua nian atu sarani katólika iha Timor-Leste bele selebra semana-santa ho di’ak”, Portavóz Komandu Polísia Nasionál Timor-Leste (PNTL), Superintendente Polísia João Belo dos Reis, relata liuhusi konferénsia Imprensa ne’ebé hala’o iha Komandu Jerál PNTL-Kaikoli, kuarta ohin.
Komandu PNTL koloka ona membru ba fatin estratéjiku sira hanesan Igreja sira no iha estrada atu asegura movimentu sarani sira bainhira partisipa misa iha durante semana-santa.
Polísia Nasionál Timor-Leste liuhusi Departamentu Polísiamentu Komunitária mós halo esforsu maka’as hodi halo koordenasaun ho parte hotu liuliu ho líder komunitária atubele koloka membru polísia sira ba fatin ne’ebé konsidera risku ba konflítu hodi garante pás no estabilidade iha festa santa ida-ne’e.
Durante selebrasaun festa páskua iha diretiva mensiona PNTL bele toma asaun represiva situasaun sira bainhira mosu perturbasaun iha Igreja no dalan públiku durante misa santa páskua.
“Ba kualkér problema ne’ebé mosu iha kualkér fatin ami nia ekipa prontu atu responde no la tolera. Polísa la fó sai membru hira mak Komandu PNTL prepara no koloka hodi asegura seguransa, maibé husu komunidade atu komunika ba polísia bainhira suspeita objetu ruma ka asaun krime ruma ne’ebé akontese iha ida-idak nia bairru ka Igreja atu nune’e bele halo atuasaun imediatu”, nia sujere.
Durante semana-santa, nia dehan polísia sei la tolera kualker atu krime sira ne’ebé mosu, tanba ne’e husi joven-sira kolabora ho polísia hodi garante seguransa iha ámbitu selebrasaun páskua nune’e bele la’o di’ak
” Husu ba joven sira evita atu konsumu alkól iha fatin públiku sira ne’ebé bele hamosu perturbasaun orden públika. Husu ba joven sira kondus motorizada ruma iha estrada públiku obedese nafatin ba regra tránzitu ne’ebé iha hodi evita asidente tráfegu ba ita nia-aan no ba utilizadór estrada sira seluk”, nia konklui.
Notísia relevante:Don Virgílio husu sarani-sira kontribui dame iha selebrasaun santa páskua
Jornalista: Natalino Costa
Editór: Florencio Miranda Ximenes
