DILI, 16 Abríl 2025 (TATOLI) – Família afetada ba alargamentu estrada husi Kuluhun to’o Maufelu-Bekora hamutuk 51 asina termu aseitasaun ho Diresaun Nasionál Planeamentu, Peskiza no Dezenvolvimentu, Ministériu Obra Públika (MOP) nian.
Iha ámbitu asinatura ba termu aseitasaun ne’e, parte MOP mós halo pubikasaun kona-ba dadus ne’ebé fulan kotuk ekipa téknika sira halo ona levantamentu no fó kustu estimativa.
Tékniku Serbisu Reasentimentu husi Diresaun Nasionál Planeamentu Peskiza Dezenvolvimentu, Samuel Dany Soares, hateten husi kustu estimativa ne’ebé MOP fó sai mak família afetada sira kokorda mak asina termu ne’e.
“Maibé la konkorda mak ami iha karta reklamasaun ba ita-boot sira bele prienxe”, Samuel Soares hateten iha sede suku Kuluhun, ohin.
Ba uma-kain sira ne’ebé aseita ho kustu ne’ebé iha mak ohin asina ona no ekipa haruka kedas ba ministériu hodi prosesa ba finansa hodi halo pagamentu.
Vítima afetada husi suku Kuluhun Olderico Barreto hateten nia parte agradese, tanba kustu estimativa ne’ebé parte MOP fó tuir duni saida mak nia gasta ona.
“Ohin ha’u asina ona termu aseitasaun. Ha’u husu maluk sira ne’ebé afetadu hanesan ha’u labele triste, tanba Governu sei halo buat di’ak ba ita. Husu ita hotu koopera nune’e bele aselera dezenvolvimentu ne’e bele la’o”, nia sujere.
Nia haktuir katak rai ne’ebé nia hela ne’e privadu no Terra no Propriedade mak sei fó indemnizasaun ba nia.
“Ha’u-nia rai nia luan no naruk ne’ebé Governu foti ba alargamentu estrada metru 5,70 no luan 28,5. Maibé ida-ne’e kustu hira Terra no Propriedade mak hatene”, dehan
Nune’e mós vítima afetada Olga Barreto Alves ne’ebé hela iha rai Estadu hateten indemizasaun ne’ebé Governu sei fó ne’e nia montante liu uitorna ho kustu ne’ebé nia gasta ona.
Tuir kustu estimativa ne’ebé MOP tau boot liu rihun mak $15-resin no ki’ik liu $500-resin (ida-ne’e ba baraka oan sira).
Xefe suku Kuluhun, Deus Dado Martins, hateten MOP lori ona lista termu aseitasaun ba komunidade asina no espera ba oin bele halo lalais pagamentu sira.
Notísia relevante: Alargamentu estrada no Indemnizasaun: Entre preokupasaun komunidade Bekora – Kuluhun no resposta Governu
Jornalista: Arminda Fonseca
Editora: Maria Auxiliadora
