DILI, 22 Abríl 2025 (TATOLI)—Deputada Bankada Opozisaun husi Partidu Libertasaun Populár (PLP), Maria Angelina Sarmento, nota Prezidente Autoridade Rejiaun Adminisitrativa Espesiál Oekusi Ambeno (RAEOA) nia serbisu hafoin asume knaar durante tinan-ida resin ona laiha progresu signifikante.
“Prezidente Autoridade RAEOA ninia serbisu ne’e laiha evolusaun progresu signifikante. Ami rasik haree bainhira ami bá halo fiskalizasaun, Prezidente rasik laiha nosaun kona-ba oinsá dezenvolve RAEOA sai rejiaun espesiál ida-ne’ebé bele lori retornu ekonómiku no bele lori investimentu,” Deputada Opozisaun hato’o iha resintu Parlamentu Nasionál (PN), tersa ne’e.
Notísia relevante : Autoridade RAEOA ezekuta ona OJE 2025 ho pursentu 29%
Nia hateten, fundu ne’ebé iha nu’udar dezenvolvimentu ba RAEOA, maibé ninia utilizasaun la hatudu progresu ida, katak investimentu husi fundu ne’e sei lori investimentu ba RAEOA.
“Justru Koordenadór ZEEDOA Zona Ekonomia Eskluziva Dezenvolvimentu RAEOA mak iha konseitu di’ak liu kona-ba oinsá dezenvolve RAEOA sai zona eskluziva ida, kompara ho Prezidente Autoridade, nia kuaze laiha ideia, nia iha argumentu polítiku de’it no konsege haree hetan de’it indivíduu sira ne’ebé uluk jere autoridade RAEOA,” nia akresenta.
Deputada ne’e nota laiha konseitu ein termu RAEOA nu’udar parte integrante husi Estadu ida atu dezenvolve ekonomia ba futuru atu labele iha depedénsia ba orsamentu Jerál Estadu.
“Prezidente Autoridade RAEOA laiha vizaun ida, tanba ami halo fiskalizasaun kuandu ko’alia ho nia kompara ho Prezidente ZEEDOA, José Gonçalves, ema ne’ebé iha liu vizaun kona-ba RAEOA duke Prezidente Autoridade RAEOA, no ha’u hanoin tempu ona Governu hola desizaun atu Oekusi oan mak kaer RAEOA,” nia katak.
Deputada Opozisaun dehan, se ema ida laiha vizaun, di’ak liu fó ba ema Oekusi oan hodi hatene kontestu sosiál, kulturál no polítika Oekusi ne’e rasik, nune’e bele iha vantajen.
Notísia relevante : Deputadu Bankada CNRT observa serbisu Autoridade RAEOA iha progresu di’ak
Aleinde ne’e, nia observa mós Prezidente RAEOA hapara projetu infraestrutura ne’ebé ein-kursu hodi halo avaliasaun.
“Halo avaliasaun tiha, einvezde nia fó projetu ne’e ba kompañia sira atu halo kontinuasaun projetu ne’e, la’ós liuhusi konkursu mais barak adjudikasaun direta de’it hodi halo lalais, se nia loke konkursu karik ne’e prosesu ida rigurozu haree ninia dokumentu sira ne’e deside tuir orsamentu ne’ebé iha,” Deputada preokupa.
Jornalista : Nelson de Sousa
Editora : Julia Chatarina
