Suku rua iha Kovalima seidauk estabelese postu saúde
KOVALIMA, 22 Abríl 2025 (TATOLI) – Ministériu saúde (MS) liuhusi Servisu saúde Munisípiu Kovalima identifika katak daudaun ne’e suku rua mak seidauk estabelese Postu saúde (PS) ba komunidade sira.
Diretór Servisu Saúde Munisípiu Kovalima, Domingos Sequeira informa, suku ne’ebé seidauk estabelese postu saúde mak hanesan suku Kasabau, lokaliza iha Postu administrativu Tilomar no Suku Ucecai iha Postu Zumalai, Munisípiu Kovalima.
“Ita iha Kovalima iha suku 30. Husi númeru ne’e, suku rua de’it mak seidauk estabelese postu saúde maibé postu sira seluk ita estabelese ona fasilidade saúde ba komunidade sira”, Dirijente saúde, Domingos Sequeira, aprezenta bainhira partisipa enkontru dahuluk sekretariadu iha salaun AMC, ohin.
Notísia relevante:Autoridade Kovalima diskuti no elabora matrís proposta projetu PDIM 2026
Dirijente ne’e esplika, bazeia kritéria MS, bainhira atu estabelese Postu saúde (PS), sidadaun atu asesu fasilidade saúde la’o ain kilometru rua no totál populasaun rihun ida-resin mak foin bele estabelese.
“Ita hotu hakarak ita-nia komunidade sira asesu ba fasilidade saúde maibé tenke haree mós bainhira estabelese fasilidade saúde ne’e haree ba balansu tanba postu saúde ida presiza koloka pesoál saúde na’in-lima bainhira estabelese postu saúde loron ida atende ema na’in-ida haree ba balansu iha ka lae”, nia esplika.
MS mós iha ona hanoin atu estabelese postu saúde (PS), ba komunidade sira, iha suku Ukekai, ne’ebé pertense ba Postu administrativu Zumalai, munisípiu Kovalima, maibé haree ba nia populasaun 200-resin de’it.
Munisípiu Kovalima iha nia Postu administrativu Fatululik, Fatumea, Fohorem, Tilomar, Maukatar, Suai no Zumalai ho nia suku 30, aldeia 148.
Tuir dadus, daudaun ne’e Ministériu saúde estabelese ona postu saúde 24 no sentru saúde iha postu administrativu Fatululik, Futumea, Fohorem,Tilomar, Maukatar, Suai no Zumalai.
Jornalista:Celestina Teles
Editór: Rafael Ximenes de A. Belo
