DILI, 23 Abríl 2025 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, konsidera Sua Santidade Papa Francisco nuudar figura ne’ebé lori Timor-Leste ba hatuur iha mapa mundu nian hanesan nasaun ida ho maioria fiar katólika.
Tenente Jenerál Falur nia konsiderasaun ne’e ho baze ba vizita Sua Santidade Papa Francisco mai Timor-Leste hodi komprova katak Timor-oan fé ne’ebé boot tebes.
Notísia relevante:Serimónia fúnebre Papa Francisco realiza iha loron 26 Abríl
¨Sua Santidade Papa Francisco nia vizita mai Timor-Leste mak lori ba mapa mundu nian. Komprova katak ita ne’e iha fé no devosaun. Nia mai ne’e hanesan ultima dispedida ba ita. Papa Francisco ne’e ita nia xefe supremu, ita sente laran susar¨, dehan Komandante F-FDTL ne’e ba jornalista iha Kuartél Jenerál F-FDTL Fatuhada-Dili, kuarta ohin.
Nune’e, Timor-Leste presiza fó omenajen ba falesimentu Sua Santidade Papa Francisco tanba nuudar líder supremu igreja Katólika iha mundu.
“Tanba ita haree iha Papa Francisco nia mensajen ikus katak nia fuan hela ho ita. Tanba ne’e ita haree iha fatin hotu-hotu sunu lilin no reza ba sua Santidade Papa Francisco no nia autoridade másimu ita-nia relijiaun nian ita laran susar ¨, dehan Falur.
Komandante F-FDTL ne’e espera katak Sua Santidade Papa foun mai bele kontinua Papa Francisco nia misaun hodi kontinua sai bibi atan ne’ebé diak hodi servi ba sarani sira iha mundu tomak.
Notísia relevante:Xanana: Papa Francisco figura di’ak ba ema hotu
Jornalista: Natalino Costa
Editór: Florencio Miranda Ximenes
