VIKEKE, 23 Abríl 2025 (TATOLI)—Diretór Diresaun Nasionál Rejistu Notaridadu (DNRN) munisípiu Vikeke, Rogério da Costa, informa DNRN munisípiu Vikeke iha trimestre dauluk ne’e la implementa rejistu movél ba kada postu sira tanba menus fasilidade.
“Ami hakarak atu ba halo atendementu movél iha postu no suku sira, maibé ami menus fasilidade. Tanba ne’e, mak to’o agora ami seidauk implementa kona-ba rejistu movél nian,” Rogério da Costa hateten ba Agência Tatoli iha ninia kna’ar fatin, Beloi, ohin.
Nune’e, nia dehan, autoridade sira husi suku mós hato’o pedidu DNRN Vikeke hodi halo atendementu hala’o rejistu movél sertidaun moris no Billte Identidade (BI), limitasaun fasilidade DNRN labele ba suku.
“Suku Fatudere no suku Bahalara Uain hato’o pedidu ba ami, hodi ba sira-nia suku halo atendementu ba komunidade iha suku. Ami seidauk bele ba tanba ami mós laiha transporte, oinsá maka ami bele dezloka ba suku sira,” nia hateten.
Kona-ba fasilidade nia prezenta, fasilidade liuliu komputadór, Printer, toner no transporte, se lori hotu fasilidade sira iha edifísiu DNRN Vikeke, entaun atendementu iha ne’e labele fó atendementu ba komunidade, no ida-ne’e sai difikuldade ba servisu DNRN Vikeke.
“Ho difikuldade sira-ne’e ami hato’o ona ba nasionál inklui mós ami relata ba autoridade munisípiu. Kuandu ami fasilidade iha ami hakarak ba implementa rejistu movél ba suku sira, hodi fasilita ita-nia komunidade trata sira-nia dokumentu,” nia hateten.
Nune’e, nia dehan, ba komunidade sira-ne’ebé presiza trata sira dokumentu sertidaun moris, BI, sertidaun Obitu mai edifisíu DNRN Vikeke.
Enkuantu, dadus funsionáriu DNRN munisípiu Vikeke hamutuk na’in-14 ne’ebé kompostu husi diretór no funsionáriu ba atendemnetu abitante sira iha Vikeke.
Jornalista : Vitorino Lopes da Costa
Editór : Cancio Ximenes
