DILI, 23 Abríl 2025 (TATOLI) – Prezidente Repúblika, José Ramos Horta, konfirmadu partisipa iha serimónia fúnebre Papa Francisco nian iha Vatikanu, iha loron 26 Abríl tinan ne’e.
“Hau sei reprezenta Estadu Timor-Leste hodi partisipa fúnebre líder mundiál maktoban Papa Francisco ne’ebé konfirmadu ona iha loron sábadu, 26 fulan-Abríl 2025, tuku 10h00 oras Roma nian”, Ramos Horta hateten iha nota ne’ebé Tatoli asesu husi Palásiu Prezidensiál, ohin.
Prezidente Repúblika sentre triste tebes ba maktoban Papa Francisco ne’ebé hakotu nia jornada moris iha mundu ida-ne’e.
“Hau sei hala’o viajen husi UK [Reinu Unidu] iha loron 25 Abríl loraik no ha’u sei to’o iha Roma kalan boot hodi partisipa fúnebre Papa Francisco nian”, informa.
Horta haktuir katak nia hakfodak no triste bainhira rona falesimentu Papa, tanba la’ós Igreja Katólika de’it mak lakon, maibé mundu tomak lakon líder mundiál, ne’ebé hatudu nia influénsia no nia fé kristaun Katólika ne’ebé forte tebes.
“Tanba ne’e mak ha’u sei reprezenta Estadu Timor-Leste iha maktoban Papa Francisco nia fúnebre no ha’u husu ba sarani hotu-hotu iha Timor-Leste nafatin halo orasaun ba ita-nia maktoban Papa Francisco”, Horta hato’o.
Aleinde ne’e, Adjunta Xefe Kaza Sivíl Palásiu Prezidensiál, Henriqueta Maria da Silva, reforsa katak Prezidente konfirmadu ona partisipa serimónia fúnebre Papa Francisco maski Parlamentu Nasionál seidauk iha koñesimentu.
“Prezidente deside ona atu partisipa iha serimonia fúnebre iha Vatikanu”, nia hateten ba jornalista sira iha Lesidere, kuarta ne’e.
Nia hatutan loloos Prezidente tenke hetan autorizasaun husi Parlamentu Nasionál, maibé ekipa Palásiu Prezidensiál sei hakerek karta ba Parlamentu Nasionál hodi justifika.
“Tanba Prezidente iha hela Bulgária, duké semo to’o mai Timor-Leste hetan autorizasaun mak bá fali, entaun Prezidente deside semo kedan bá Vatikanu. Ami sei hein instrusaun husi Prezidente Repúblika mak informa ba Parlamentu Nasionál kona-ba Prezidente nia viajen ne’e”, dehan.
Notísia relevante: Ministru Bendito reprezenta Governu Timor-Leste partisipa serimónia fúnebre Papa Francisco
Papa Francisco hakotu iis iha segunda (21/4/2025). Ho nia mate ne’e, Papa hakotu nia ukun durante tinan 12 nu’udar líder másimu Igreja Katólika nian.
Segunda dadeer semana ne’e, hakmatek iha Roma nakfilak ba momentu lutu nian ba mundu katóliku. Iha tuku 7:35 dadeer oras lokál iha loron 21, sinál sira mate nian lian husi Bazílika São Pedro nian, hodi fó sai katak Papa Francisco mate ona ho tinan 88.
Notísia relevante: Serimónia fúnebre Papa Francisco realiza iha loron 26 Abríl
Jornalista: Hortencio Sanchez
Editora: Maria Auxiliadora
