DILI, 24 Abríl 2025 (TATOLI) – Arkidioseze Metropolitana Dili, liuhusi Vigáriu Episkopál Pastorál arkiodioseze Dili, Pe. Jovito Rego de Jesus Araújo, husu sarani sira atu kuidadu fatin santu altar Tasi-tolu ho di’ak, tanba ida-ne’e memória patrimoniál sagradu ida ba nasaun no povu Timor-Leste.
“Uma-kreda husu ho respeitu ba sarani sira hotu-hotu ne’ebé sente katak prezensa amu Papa nia iha Tasi-tolu ne’e, sentidu ba ita hotu tanba ne’e mai ita kolabora ho Governu atu hadi’a fatin sagradu. Buat ne’ebé Estadu husik hela ne’e, la’ós Estadu ninian de’it, maibé ne’e povu Timor nian”, Vigáriu Episkopál Pastorál arkiodioseze Dili, Pe. Jovito Rego de Jesus Araújo, hateten ba jornalista sira iha Kámara Ekleziástika Bidau-Lesidere, Dili.
Amu-lulik ne’e fó hanoin, “Buat ne’e sai tiha patrimóniu ida ba ita hotu, ne’ebé mai ita hotu tau matan. Keta ba sobu fali buat hirak-ne’e”.
Pe. Jovito Rego de Jesus Araújo hateten, altar santu Tasi-tolu ne’e konsideradu hanesan bein-komun (públiku nian) katak ne’e ema hotu nian la’ós individu ka ema ida nian no bainhira hetan estragu, kreda triste tebes.
Notísia relevante:Komandu PNTL mantein koloka membru asegura Altár Tasi-Tolu
“Ami sente triste tanba fiu sira-ne’e ba ko’a kotu hotu, ahi-oan (lampu) ne’ebé monta ba ho di’ak maibé hetan estraga hotu, odamatan sira inklui mós lutu (pagar) sira-ne’e, imi nia konsiénsia ne’e iha ne’ebé?”, amu lamenta.
Na’i-lulik ne’e haklaken, ita hotu-hotu mak tenke iha de’it sentidu sagradu katak buat ne’ebé ita dedika tiha ona ba uma kreda, ba Maromak liuhusi fatin ida-ne’ebé istóriku tanba amu Papa nain-rua ona mak sama ain iha fatin ida-ne’ebá.
“Ne’e ita atu prezerva nafatin fatin ne’e ho ninia kondisaun sira hotu ne’ebé Governu hasai osan lubuk ida hodi prepara fatin ne’e tanba iha tinan kotuk ne’e, Governu hasai osan rihun atus tolu resin hodi sobu uma sira-ne’ebé besik iha ne’ebá hodi harii fatin santu ne’e”, nia haktuir.
Vigáriu Episkopál Pastorál arkiodioseze Dili, Pe. Jovito Rego de Jesus Araújo énfaze tan katak maske konstrusaun seidauk hotu maibé komunidade balun ba harii fali uma iha ne’ebá.
“Ida-ne’e ita tau ita-nia neon ne’e iha ne’ebé? No, tau domin ba uma kreda ne’e iha ne’ebé. Buat sira-ne’e kontradisaun nune’e presiza koopera malu hodi kuidadu fatin ne’e to’o tinan naruk ba jerasaun sira,” nia lamenta.
Notísia relevante:Igreja prepara meza altar modelu “Ró” ba misa solene iha Tasi-Tolu
Jornalista: Alexandra da Costa
Editór: Rafael Ximenes A. Belo
