Komandu PNTL mantein koloka membru asegura Altár Tasi-Tolu
DILI, 12 setembru 2024 (TATOLI) – Komandante Komandu (PNTL) Munisípiu Dili Superintendente Xefe Orlando Gomes, dehan Komandu PNTL nafatin koloka membru sira hodi asegura Altár Tasi-Tolu.
“Komandu Munisípiu Dili nafatin koloka membru sira hodi asegura sasan sira iha Altar Tasi-Tolu. Komandu PNTL Munisípiu Dili mós iha tempu kalan halo patrollamentu bebeik ba fatin ne’ebá para ema labele ba estraga no destrui tiha sasan sira iha ne’ebá. Ita tenke nafatin asegura sasan sira ne’e no prezerva fatin sira ne’e, liuliu altar ne’e bele di’ak nafatin”, Orlando Gomes hateten ba jornalista sira iha nia kna’ar Komandu PNTL Munisípiu Dili Caicoli, kinta, ohin.
Nia dehan, PNTL sei halo diálogu ho komunidade sira iha Tasi-Tolu atu sira mós bele kontribui hodi apoia no asegura nafatin Tas-Tolu.
“Fatin ne’e, fatin sagradu presiza tenke asegura duni fatin ida-ne’e, tanba ne’e komandu sei nafatin asegura ba fatin ne’e to’o bainhira iha desizaun husi ita-nia Governu no parte igreja. Agora daudaun ita monta seguransa, ita koloka ita-nia postu rua iha ne’ebá hodi asegura fatin ne’e. To’o agora ita sei nafatin asegura nafatin ne’e”, nia konklui.
Jornalista: Natalino Costa
Editór : Zezito Silva
