Igreja prepara meza altar modelu “Ró” ba misa solene iha Tasi-Tolu
DILI, 01 agostu 2024 (TATOLI)–Vise Koordenadór ba preparasaun vizita Papa nian hosi igreja no atual pároku Igreja Santo António Motael, Pe. Guilhermino da Silva, hateten igreja prepara modelu meza altar ba misa solene iha Tasi-Tolu ne’e hanesan “Ró”, ne’ebé reprezenta misionariu sira-nia prezensa iha illa Timor liuhusi Lifau, Oé-Cusse iha tinan 1515 liubá ne’e.
Notísia Relevante: Ai-naa sai meza sakrifísiu hasa’e karan lulik ba Maromak
Nai lulik ne’e esplika, medida ba meza altar ne’e ho nia aas iha metru ida (1) sentimetru 10, naruk metru rua (2) ho nia luan hamutuk sentimetru 60.
“Altar ne’e nia modelu hanesan ró ka bero. Ida-ne’e ita hanoin fila-fali misionáriu sira ne’ebé uluk tama iha Timor, sira tama mai Timor ho ró ka bero hodi haklaken evanjellu iha rai Timor,” Vise Koordenadór ba preparasaun vizita Papa nian hosi igreja no atuál pároku Igreja Santo António Motael, Pe. Guilhermino da Silva, hateten ba Tatoli iha Balide.
Meza altar nia lolon ne’e mós sei hakerek iha fraze biblika (Mt: 5, 13-16) ne’ebé pronunsia husi Papa João Paulo II ba sarani sira iha nia vizita pastorál iha tempu okupasaun Indonézia, iha 12 outubru 1989 liubá ne’e.
Notísia Relevante: Ai-naa sai meza sakrifísiu hasa’e karan lulik ba Maromak
“Iha altar ne’e, nia lolon sei hakerek liafuan ne’ebé Papa João Paulo II hato’o ba timoroan sira iha 1989 iha Tasi-Tolu katak “Imi mak masin no roman mundu nian”, nia fó hanoin.
Ida-ne’e, nia dehan, timoroan sira hakarak hanoin ka lembra nafatin liafuan ne’ebé Papa São João Paulo II hato’o ba timoroan sira, nune’e timoroan sira ida-idak kontinua kaer metin liafuan ida-ne’e to’o ohin loron.
Iha Papa Francisco nia vizita Estadu no pastorál ne’e, hanesan vizita Papa ba daruak nian mai iha Timor-Leste ne’e, nune’e Vatikanu hili tema vizita pastorál Santo Padre Francisco nian mak “Que a vossa fe seja a vossa Cultura”.
Ba sarani sira-ne’ebé iha momentu ne’ebá partisipa iha misa Tasi-Tolu nian ho Papa João Paulo II ne’e, sira hatene ida-ne’e no sira mós iha sira-nia moris nu’udar sarani ne’e luta no hakaas aan nafatin atu sai masin no roman ba mundu nian.
Nai lulik ne’e hateten, preparasaun tékniku halo meza altar ho modelu “Ró” ne’e daudaun ne’e atinjie ona 80%.
“Aleinde badaen sira prepara meza altar, prepara mós ambaun ida (1) no kadeira hamutuk kuaze 100,” nia dehan.
Notísia Relevante: Papa prezide misa iha lian Portugés-orasaun universál lee iha dialeitu 6
Jornalista : Jesuína Xavier
Editór : Cancio Ximenes
