DILI, 24 Abríl 2025 (TATOLI)-Komisaun A iha Parlamentu Nasionál (PN) ne’ebé trata asuntu Justisa no Konstituisionál hein Governu liuhusi Ministériu Justisa hodi aprezenta proposta-lei liberdade relijiozu hodi bele regula relijiaun sira ne’ebé doutrina la klaru hala’o atividade iha rai-laran.
“Ami enkontru ho membru Governu tutela, hotu-hotu konkorda atu avansa ho lei, maibé lei tenke mai ho proposta husi Governu”, Deputadu membru Komisaun A, Duarte Nunes, hato’o iha resintu PN, kinta ne’e.
Nia dehan, informasaun ne’ebé komisaun simu Governu mak hala’o hela konsultasaun no prepara ona esbozu proposta-lei.
“Hafoin ita avansa ho lei ida di’ak ba ema hotu, ne’ebé ami hein hela, ita atu regula oinsá ne’e orsida hanoin mós mai husi Igreja sira”, akresenta.
Deputadu husi Bankada CNRT ne’e, preokupa foin lala’is mosu polémika iha públiku kona-ba Igreja Katólika Karismátika Timor-Leste (ICCTL, sigla portugés).
“Tanba hanesan foin daudaun akontese ne’e la’ós organizasaun ruma mak hakarak mai harii instituisaun ka relijioza, lae, ema organiza-an, depois ha’u lahatene oinsá investigasaun la’o hela iha PCIC (Polísia Sientífika Investigasaun Kriminál-tetun), investiga hela lori ba tribunál tanba saida mak sira mai halo konfuzaun iha komunidade maiória Katólika nia leet”, nia preokupa.
Nia hatutan: “Tama iha sosiedade ida hanesan ne’e tenke komporta ho se mai halo buat seluk tuir buat ne’ebé husu ne’e lisensa sira iha ne’e”.
Antes ne’e, Deputadu Bankada Opozisaun husi KHUNTO, António Verdiál de Sousa, husu atu órgaun lejislativu no ezekutivu kria lei, regula relijiaun sira ne’ebé tama mai rai-laran hala’o atividade ho doutrina la klaru.
Notísia relevante: Membru PN husu autoridade kompetente investiga ICCTL
Jornalista : Nelson de Sousa
Editora : Rita Almeida
