BOBONARU, 25 Abríl 2025 (TATOLI)—Abitante sira iha aldeia Anapálsentr triste no preokupa ho kondisaun estrada liga husi suku Molop ba suku Sibuni to’o kapitál postu administrativu Bobonaru, munisípiu Bobonaru tanba difikulta tebes movimentasaun transporte liuliu iha tempu udan.
Abitante Anapál, Flaviana Pereirra, rekomenda ba Governu atu tau iha planu prioridade hodi rezolve problema ne’e atu fasilita movimentu komunidade husi aldeia ba kapitál postu administrativu no Munisípiu.
Notísia Relevante: Mota Pazól-Laku difikulta abitante Molop-Sibuni asesu merkadu
“Ami hodi liman mak halo mai to’o Anapál, Ma’ui tanba ami hakarak buat furak. Se udan-boot la di’ak, la’o ho ain de’it, bainhira moras se ema ruma atu atende ita, bele ba, maibé se ema laiha pasiénsia iha uma de’it,” Nia informa ba jornalista sira, iha kapela Leobalo Anapál, fo’in lalais ne’e
Flaviana hatutan, problema ne’e líder komunitária sira hato’o beibeik ona ba parte kompetente no membru Governu barak mak haree ho matan, maibé to’o ágora laiha rezultadu ruma.
“Hanesan de’it, tinan barak mak ko’alia ba ko’alia, maibé buat ida la sai rezultadu. Sira hato’o promesa falsu. Iha tempu atu vota ona sira tama sai halibur ami sira-ne’e ba oin hotu, maibé ikus ona la haree, ami sira-ne’e iha kotuk fali,” nia dehan.
Abitante Anapál, Almeiro de Jesús, reforsa durante ne’e sira sente izoladu, tanba kondisaun estrada ladi’ak no laiha ponte atu fasilita transporte públiku asesu ba mai.
Tuir nia, problema ne’e afeta makaas atividade ekonomía iha suku no implika ba folin nesesidade bazika sa’e tanba distánsia husi suku Molop ba kapitál Munisípiu do’ok.
Aleinde afeta ba setór ekonomía, Almeiro argumenta problema ne’e afeta mós ba setór saúde, tanba tempu udan karreta Ambulánsia labele transporte pasiente ho emerjénsia husi postu Saúde Molop ba Sentru Saúde Bobonaru no Hospitál Referál Maliana.
Almeiro afirma, Governu presiza tau-prioridade mós ba ponte tanba suku Molop no Sibuni kuaze haleu husi mota.
“Ami-nia estrada ne’e karik fallansu ruma iha ami-nia suku laran, ami husu ba Estadu atu tau-matan ba suku ida-ne’e. Tempu udan atu ba bazar karik, ami la’o de’it, transporte labele movimentu ba-mai, hakur mota rúa, husi Molop ne’e mota Pazól no mota Lomea, entaun populasaun sira husu suku Molop atu ba halo negósiu la asesu,” nia dehan.
Tuir Observasaun Tatoli iha terrenu nota katak komunidade atu asesu ba-mai tenke ajuda-malu hakur mota rua hanesan Pazol no Laku ne’ebé kle’an tebes, tanba seidauk iha ponte.
Informasaun ne’ebé Tatoli asesu katak iha tinan 2022 ne’e mota Laku konsege hamate ema na’in-rua (oan no aman) hafoin viajen husi postu Bobonaro iha tempu udan.
Aleinde ne’e, iha tinan entre 2015 no 2016 mós akontese mota lori komunidade na’in-tolu (3) no la konsege salva sira-nia vida.
Notísia Relevante: Abitante sira iha Omelai halerik ba estrada-ponte
Jornalista : Sergio da Cruz
Editór : Cancio Ximenes
