Komisáriu Rui Pereira husu PN bele inisia projetu-lei rekuperasaun ativu
DILI, 29 Abríl 2025 (TATOLI)—Komisáriu Komisaun Antí-Korrupsaun (CAC, sigla portugés), Rui Pereira dos Santos, husu órgaun lejizlativu atu inisia projetu-lei rekuperasaun ativa.
“Implementasaun atividade prevensaun no investigasaun krime korrupsaun, CAC mós identifika dezafiu oinoin iha esforsu koletivu Estadu nian ba prevene no kombate korrupsaun. Dezafiu sira mak hanesan seidauk estabelese rejime rekuperasaun ativu (asset recovery),” Komisáriu CAC hato’o bainhira aprezenta relatóriu anuál 2024 ba Parlamentu Nasionál (PN), Tersa ne’e.
Nia dehan, iha serbisu investigasaun kriminál, liuliu iha krime korrupsaun, autoridade judisiáriu sira inklui órgaun Polísia kriminál no CAC rasik hasoru difikuldade atu deteta no lori fila rikusoin Timor-Leste nian ne’ebé mak korruptór sira depozita iha rai-li’ur ka lori halai bá rai-li’ur.
“Esforsu sira hodi halo projetu-lei ne’e inisia ona husi Ministériu Públiku iha tinan anteriór, nune’e CAC hato’o ba Parlamentu Nasionál atu halo diskusaun hodi aprova projetu-lei rekuperasaun ativu, nune’e bele tulun autoridade judisiál no órgaun Polisiál sira-nia serbisu iha esforsu rekupera hikas rikusoin Estadu ne’ebé korruptór sira subar ka halo depozitu bá rai-li’ur,” nia akresenta.
Notísia relevante : CAC konvoka reuniaun ho entidade sira haforsa servisu prevensaun korrupsaun
Aleinde ne’e, difikuldade seluk mak seidauk estabelese rejime jestaun apreensaun ba objetu sira.
“Difikuldade seluk ne’ebé órgaun Polísia kriminál hasoru mak relasiona ho jestaun apreensaun objetu sira. Timor-Leste seidauk iha mata-dalan atu halo jestaun ba apreensaun objetu inklui espasu adekuadu hodi rai objetu sira. Konsekuénsia mak apreensaun ba objetu hirak ne’ebé órgaun Polísia Kriminál sira halo laiha kontrolu di’ak no manutensaun laiha,” Komisáriu Rui Pereira tenik.
Ho nune’e, depresiasaun husi objetu hirak sai boot no ikus mai, objetu hirak ne’e valór ekonómiku laiha.
“Husu ba Parlamentu atu estabelese ona enkuadramentu legál ba asuntu ne’e. CAC mós husu atu estabelese mós diresaun ida ba jestaun apreensaun objetu sira, nune’e bele asegura objetu aprendidu sira ne’ebé órgaun Polisiál sira apreende hodi bele rai iha kondisaun ne’ebé di’ak no mantein valór ekonómiku ba Estadu,” Komisáriu CAC hato’o.
CAC mós husu Parlamentu atu aprova orsamentu razoável tanba durante ne’e hasoru limitasaun rekursu finanseiru, nune’e bele haforsa liután asaun no esforsu adekuadu no efetivu ba prevensaun no kombate korrupsaun.
Deputadu Bankada CNRT, Patrocínio dos Reis, hateten auzénsia kuadru legál balun bele sai dezáfiu ba instituisaun ne’e nia serbisu.
“Haree kuadru legál ne’ebé mensiona mais tékniku operasionál ne’ebé ami husu CAC bele sai hanesan autór atubele prepara ninia ezbosu hodi aprezenta ba Governu nune’e bele haree hodi lori mai Parlamentu atu ita bele diskute,” nia fó hanoin.
Jornalista : Nelson de Sousa
Editora : Julia Chatarina
