DILI, 30 Abríl 2025 (TATOLI)—Governu liuhusi reuniaun Konsellu Ministru (KM), kuarta ne’e, diskute no halo aprovasaun ba alterasaun daruak ba rezolusaun Governu kona-ba kriasaun Zona Ekonómika Espesiál Dezenvolvimentu Oekusi Ambenu (ZEEDOA).
“Aprova projetu Rezolusaun Governu ba alterasaun daruak husi Rezolusaun Governu nú. 7/2024, loron 24 fulan-Janeiru, kona-ba Kria Komisaun Ezekutiva ho objetivu atu estabelese Zona Ekonómika Espesiál Dezenvolvimentu iha Oekusi Ambenu,” refere nota ne’ebé Agência Tatoli asesu, ohin.
Ho alterasaun ida-ne’e, Komisaun Ezekutiva nia mandatu aumenta ba fulan ida tan, hodi permite atu konklui serbisu sira-ne’ebé la’o hela.
Antes ne’e, KM aprova projetu Dekretu-Lei ba Alterasaun dahuluk husi Dekretu-Lei nú. 1/2015, loron 14 fulan-Janeiru, kona-ba Fundu Espesiál ba Dezenvolvimentu. Diploma ne’e aprezenta husi Primeiru-Ministru, Kay Rala Xanana Gusmão, Prezidente Autoridade Rejiaun Administrativa Espesiál Oekusi Ambenu (RAEOA), Rogério Tiago de Fátima Lobato, no Koordenadór Komisaun Ezekutiva ba estabelesimentu ZEEDOA, João Mendes Gonçalves.
Objetivu hosi diploma ida-ne’e mak atu adapta Fundu Espesiál Dezenvolvimentu RAEOA nian tuir dispozisaun foun Lei nú. 18/2023, iha loron 30 fulan-Novembru, ne’ebé halakon Zona Espesiál Ekonomia Sosiál Merkadu Oekusi Ambenu no Ataúru no prevee kriasaun Zona Ekonómika Espesiál foun ida.
Define fila-fali atribuisaun no objetivu sira Fundu nian, ne’ebé tutela mós hosi Primeiru-Ministru.
Diploma ne’e prevee implementasaun rejime tranzitória ida ba Fundu Espesiál Dezenvolvimentu nian, hodi fornese ba nia instrumentu jestaun no kapasidade operasionál ne’ebé permite hahú projetu prioritáriu ba dezenvolvimentu, prepara estrutura jestaun ida-ne’ebé efisiente no finansia projetu estratéjiku tinan-barak ho karáter sosiál no ekonómiku.
Medida sira-ne’e ho objetivu atu garante resposta ba estratéjia dezenvolvimentu ba Oekusi Ambenu hotu iha tempu médiu no tempu naruk, ho benefísiu reál liuliu ba populasaun Oekusi no Timor-Leste ein jerál.
Jornalista : Hortencio Sanchez
Editór : Cancio Ximenes
