OEKUSI, 01 Maiu 2025 (TATOLI) – Primeiru-Ministru, Kay Rala Xanana Gusmão, akompaña husi Prezidente Autoridade Rejiaun Administrativa Espesiál Oekusi Ambenu (RAEOA), Rogério Lobato, observa ponte Noel-Ekat, iha suku Bobometo, sub-rejiaun Oésilo, ba futuru atu konstrui ponte alternativa liga Oésilo no sub-rejiaun Pássabe.
Iha biban ne’e, Xefe Governu fó hanoin ba Autoridade RAEOA atu prepara planu ho dezeñu ne’ebé di’ak, nune’e bele harii ponte altervativa iha mota Noel-Ekat hodi fasilita movimentu komunidade no transporte sira iha tempu udan atu asesu bá merkadu.
“Ami liu mai haree imi-nia dalan ne’e tik tok l0os, nune’e ami ko’alia ona para bele prepara dezeñu ida hodi halo ponte iha mota Noe-Ekat nian atu sira husi Pássabe bele liu mai Pante Makasar ho a vontade”, Xanana dehan durante diálogu ho komunidade iha suku Bobometo.
Notísia relevante: PM Taur felisita Autoridade RAEOA hatuur fatuk dahuluk ba estrada nasionál Oésilo
Iha fatin hanesan, Prezidente Autoridade RAEOA, Rogério Lobato, informa katak ekipa téknika sira husi Diresaun Rejionál Infraestrutura hamutuk ho empreza estatál Indonézia Waskita Karya prepara ona panta no kadernu enkargu (BoQ, sigla inglés) atu harii ponte iha tinan ne’e.
“Iha semana kotuk, Waskita Karya aprezenta dezeñu ida atu halo ponte iha mota Noel-Ekat. La kle’ur tan sira sei tau ona asfáltika husi Tono mai Oésilo kontinua mai to’o iha mota Noel-Ekat atu tau ponte. Depois ita sei haree bainhira mak bele hahú atu halo ponte ne’e”, dehan.
Autoridade ne’e informa katak bainhira ponte ne’e harii sei fó benefísiu no hasai povu husi izolamentu, tanba dadaun ne’e iha Oekusi tomak Governu hahú loke estrada foun, inklui aterru estrada no sei nahe alkatraun.
Iha biban ne’e, Xefe Suku Bobometo, José Labi Caet, agradese ho programa Governu ba konstrusaun ponte Noel-Ekat, tanba movimentu komunidade sempre liuhusi mota ne’e no bainhira tempu udan difikulta sira hodi ultrapasa.
“Ha’u-nia preokupasaun ne’e kle’ur ona. Uluk mós ha’u hato’o ba autoridade atu harii ponte ne’e no ohin ha’u rona katak atu konstrui. Ida-ne’e orgullu boot ba komunidade Bobometo no Pássabe tanba durante ne’e susar tebes atu hakat liu bainhira iha tempu udan”, nia hato’o.
Notísia relevante: Progresu konstrusaun estrada Nasionál husi Tono bá Oesilo atinje ona 27%
Ponte ne’e konstrui nu’udar pakote husi projetu reabilitasaun estrada nasionál husi terminál Tono, sub-rejiaun Pante-Makassar to’o Oésilo, ne’ebé ezekuta hus Waskita Karya ho valór kontratu millaun $33 ho distánsia kilómetru 17.
Jornalista: Abílio Elo Nini
Editora: Maria Auxiliadora
