OEKUSI, 04 Abríl 2025 (TATOLI) –Projetu estrada nasionál nu’udar pakote B husi terminál Tono suku Cunhasub-rejiaun Pante Makasar liga ba fronteira Napan suku Bobometo sub-rejiaun Oésilo, daudaun ne’e nia progresu fíziku atinje ona 27%.
Notísia relevante:Rogério Lobato preokupa projetu estrada Tono ba Oésilo gasta millaun 33-resin
Diretór Diresaun Rejionál Infraestrutura (DRI), Remigío Nuno Sila, informa katak, bazeia rezultadu fiskalizasaun, kompañia kumpre ona materiál sira-ne’ebé DRI propoin, nune’e bele kontinua hafoin suspende tinan ida.
Purtantu, kona-ba pakote A husi ponte Noefefan, suku Lifau, sub-rejiaun Pante Makasar liga bá Oénunu, suku Sun-Ufe sub-rejiaun Nítibe, Autoridade RAEOA kontinua suspende no sei loke fali konkursu foun.
“Pakote B estrada nasionál husi Tono ba Oésilo, nia servisu agora la’o hela ho nia progresu fiziku 27%, ita haree parte Oésilo sentru servisu la’o hela, lahanesan tinan kotuk, tanba kompañia hahú halo eskavasaun hodi prepara atu tau asfaltiku iha parte rai tetuk, husi Noefefan ba Oénunu konkursu foun fali,” Diretór Diresaun Rejionál Infraestrutura, Remigío Nuno Sila, informa iha Oekusi, foin lalais ne’e.
Notísia relevante:Utilizasaun materiál ba konstrusaun estrada Noefefan-Oénunu la tuir BoQ
Entretantu, kompañia Internasionál PT Waskita Karya, ezekuta projetu estrada nasionál ne’e sei hahú husi eis merkadu Tono, suku Cunha, sub-rejiaun Pante Makasar sei to’o fronteira Napan, suku Bobometo, sub-rejiaun Oésilo ho distánsia kilómetru 17.
Valór kontratua projetu ne’e hamutuk $33,915,000.00 orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua.
Notísia relevante:Autoridade hala’o serimónia kulturál molok ezekuta estrada nasionál Tono ba Oésilo
Jornalista: Abílio Elo Nini
Editór: Florencio Miranda Ximenes
