BOBONARU, 02 Maiu 2025 (TATOLI) – Autoridade Munisipál Bobonaru (AMB) halo lansamentu fatuk dahuluk ba konstrusaun Jardín 08 de Setembr0, iha Maliana. Projetu ne’e husi Planu Dezenvovimentu Integradu Munisipál (PDIM) tinan 2025 ho valór orsamentu $80.999,54.
Sekretáriu Autoridade Munisípiu Bobonaru ba Asuntu Planeamentu, Semedo Laco, konfirma katak obra ne’e hanesan faze inísiu ida oinsá atu kria espasu verde barak iha kapitál Maliana.
Notísia Relevante: Autoridade Bobonaru sei implementa projetu PDIM 2025 iha tempu badak
“Ita tenke halo espasu verde ne’e barak. Ita lakohi sidade nakonu ho edifisíu, nakonu ho muru, espasu verde laiha. Ita hakarak kria jardín ne’e iha fatin-fatin para ita-nia ema sira, família sira labele la’o dook atu tuur halimar. Ita koko hadi’a neneik, tinan ne’e itá hahú ho ida ne’e, tinan oin mós ita sei halo espasaun iha fatin seluk”, nia hateten iha serimónia lansamentu ne’e.
Semedo salienta katak Autoridade Munisípiu Bobonaro mós planeia atu tau orsamentu iha tinan oin hodi alarga Jardín 08 de Setembro haleu kampu futeból Maliana.
“Ita-nia kampu ida-ne’e ba futuru sei haleu ho jardín hotu, depois halo paving haleu. Sé mak atu halo ezersísiu karik mai halai iha ne’e. Ba desportu nian, ita sei buka dezenvolve iha fatin seluk. Suku ne’ebé iha rai-luan, ita sei halo kampu futeból iha ne’ebá”, nia adianta.
Reprezentante Administrador Postu Administrativu Maliana, Francisco da Costa, agradese ba autoridade Bobonaru ne’ebé konsege implementa ona obra ne’e.
Biban ne’e, Francisco husu ba empreza resposavel Nalo Bul Unipessoal Lda. atu ezekuta obra ne’e tuir dezeñu, nune’e bele finaliza ho rezultadu di’ak no kualidade.
“Rekomenda ba kompañia keta haree ba kuantidade, maibé ba kualidade tanba projetu ida-ne’e iha kapitál munisípiu Bobonaru, ema hotu-hotu tau-matan”, afirma.
Reprezentante Komandante PNTL Bobonaru, Inspetór José Bere Biti, hateten autoridade seguransa prontu garante obra ne’e finaliza tuir kalendáriu ne’ebé deside ona.
“Ita hakarak ita-nia dezenvolvimentu tenke la’o ne’e la’ós seguransa mesak nia preokupasaun. Hakarak entidade hotu-hotu tenke kolabora, apoia atu ita-nia serbisu ne’e bele la’o tuir tempu ne’ebé Governu fó”, nia salienta.
Notísia Relevante: Bobonaru prevee millaun $26-resin iha proposta OJE 2026
Aleinde lansa fatuk dahuluk ba konstrusaun jardín, Autoridade Munisípiu Bobonaru mós halo lansamentu ba projetu konstrusaun Sala Maternidade iha Sentru Saúde Maliana no Eskola Bázika Sentrál Samutaben, iha suku Manapa, postu administrativu Kailaku.
Jornalista: Sergio da Cruz
Editora: Maria Auxiliadora
