BOBONARU, 02 Maiu 2025 (TATOLI) – Líder komunitáriu, lia-na’in, autoridade postu administrativu Atabae, hamutuk ho Diresaun Servisu Munisipál Edukasaun no Diresaun Terra no Propriedade Bobonaru, halo levantamentu dadus ba rai ne’ebé komunidade oferese ba Ministériu Edukasaun (ME) atu konstrui Eskola Bázika Filiál (EBF) Madebau foun, iha suku Atabae.
Xefe suku Atabae, Juvinal Reis Cardoso, hateten rai ne’e uma-ka’in tolu mak oferese ho nia medida ektare ida-resin, tanba eskola atuál danifika kauza husi dezastre naturál.
Notísia Relevante: Falta metru ida-resin, korrente Bee-mota atu sobu EBF Madebau
“Rai ne’e ita-nia komunidade entrega ba Edukasaun, tanba eskola klima mai sobu tiha. Nune’e, ami hanesan autoridade halo enkontru ho komunidade, aproxima sira, depois sira prontu atu muda eskola mai iha fatin ne’ebé seguru. Ho ida-ne’e mak sira oferese rai ida-ne’e”, Juvinal Cardoso informa, ohin.
Diretór Servisu Munisipál Edukasaun Bobonaru, Miguel Freitas, afirma katak proposta atu harii eskola foun ne’e hato’o ona ba parte Diresaun Infraestrutura Eskolár Ministériu Edukasaun.
“Iha primeira vizita ha’u ho Prezidente Autoridade mak mai. Iha segunda vizita mós nune’e, ami mai haree bee-mota tuun mai rabat kedas eskola, entaun ami ho komunidade mai survey fatin ne’e mak ohin loron ita mai sukat rai hodi hein nia konstrusaun. Se la’e to’o tinan oin mak bee tuun mai iha área eskola, entaun prosesu aprendizajen labele la’o ho diak”, katak.
Notísia Relevante:ME presiza rezolve kondisaun EBF Madebau
EBF Madebau atuál ne’e Governu konstrui iha tinan 2009, liuhusi Projetu Pakote Referendu. Totál estudante iha EBF ne’e hamutuk 74 no manorin haat.
Jornalista: Sergio da Cruz
Editora: Maria Auxiliadora
