OEKUSI, 02 Maiu 2025 (TATOLI)– Primeiru-Ministru, Kay Rala Xanana Gusmão, akompaña husi Prezidente Autoridade Rejiaun Administrativa Espesiál Oekusi Ambeno (RAEOA), sesta ne’e, kolleta hare membramo ektare 27 husi natar na’in-69 iha natar suku Lifau sub-rejiaun Pante Makasar.
Natar ektare 27 ne’e, rezultadu husi aplikasaun adubu orgániku Ako’y Magsasakang Orgániku (AMO), ne’ebé antes ne’e Autoridade RAEOA liuhusi Sekretária Rejionál Asuntu Agrikultura, simu sosa husi Empreza JJEA Agriventures.CO husi nasaun Filipina ho kustu rihun $600 ho objetivu atu hasa’e produsaun agríkola no hamate peste iha natar no to’os.
Notísia relevante:Autoridade RAEOA sosa adubu orgániku AMO hodi hasa’e produsaun agríkola
Tan ne’e, Primeiru-Ministru, Kaya Rala Xanana Gusmão, rekomenda atu kontinua aplika, adubu organiku ba agrikultór sira, nune’e bele garante produsaun tantu hare, batar inklui produtu lokál seluk.
“Antes ha’u mai to’o ne’e, iha natar balun bee seidauk tama, iha ne’e ektare 27 kolleta daudaun ona, ne’e duni, inisíu hahú di’ak ona, kontinua nafatin, ha’u haree kapa’as tebes, ita foin hahú dalaruma, iha tinan ida hakarak halo buat hotu-hotu, importante ita hahú, no iha tinan seluk aumenta taan, la’os natar de’it maibé ba buat seluk taan, hanesan ai-fuan, tan ne’e labele lakon prinsipíu inovasaun, ne’e mak ohin simu ona inovasaun husi AMO atu hasa’e produsaun agrikola, ” dehan Primeiru-Ministru iha ámbitu kolleta hare membramo ne’e.
Notísia relevante::PA RAEOA lansa adubu orgánika hasa’e produsaun no hamate Lakataru
Iha fatin hanesan, Prezidente Autoridade RAEOA, Rogério Tiago Lobato, hato’o agradesimentu tanba ho prezensa Primeiru-Ministru, hanesan enkorajamentu bo’ot ba autoridade RAEOA atu kontinua mellora servisu sira iha Oekusi.
“Natar sira-ne’e uza adubu organiku AMO, ida-ne’e bele hasa’e produtividade hare nian iha Oekusi husi tonelada rua ba tonelada 6,3, ida-ne’e atu hasai tanba ami-nia tarjetu bele to’o tonelada 9 kada ektare. Tan ne’e iha ektare 27 ohin ne’e, ita sei kolleta hare kulit ne’e kauze tonelada 1000. Tanba polítika Governu nian atu hasa’e ita husi depedensia importasaun husi rai li’ur, kria autofisiénsia alimentar, ha’u fi’ar katak Oekusi nia área produsaun sempre ektare 3000, sekarik ita konsege halo produsaun iha produsaun barakliu tan,” nia orgullu.
Notísia relevante:Agrikultura Oekusi rega adubu orgániku AMO ba natar ektare 52
Jornalista: Abílio Elo Nini
Editór: Florencio Miranda Ximenes
