DILI, 03 Maiu 2025 (TATOLI)—Prezidente Asosiasaun Nasionál Múzika Timor-Leste (ALMAMOR), Filipus Nino Pereira, husu artista no grupu artista iha Timor-Leste atu hamutuk hodi promove no lori múzika (knananuk) Timor-Leste nian ba mundu.
Notísia Relevante: ALMAMOR prosede eventu Timor-Leste Music Awards 2024
“Tinan 25 ALMAMOR nia ezisténsia nu’udar resurreisaun ida tanba ne’e husu ba grupu múzika hotu no individuál atu hasoru múzika modernu globalmente hodi mantein eziste iha Timor – Leste hodi promove knananuk Timor–Leste nian ba mundu. Tenke luta ba moris nian no ba interrese dezenvolvementu múzika iha ita-nia rain. Tinan 25 ne’e hanorin barak mai ita. Iha tinan 25 liuhosi dezafiu oioin maibé ita hamutuk hodi hametin nafatin fundasaun nu’udár ema artista iha Timor-Leste.” Prezidente ALMAMOR ne’e hateten iha ámbitu selebra tinan 25 ezistensia ALMAMOR, iha Fundasaun Oriente, sábadu ne’e.
Ttinan 25 liubá, nia dehan, ALMAMOR hamutuk ho grupu artista no artista individuál iha Timor-Leste ultrapasa resureisaun múzika nian, ne’e prova katak artista timor-oan hanesan Ego Lemos ho artista seluk konsege lori knananuk tradisionál no nasionál Timor-Leste nian hodi hananu iha Austrália no nasaun seluk iha mundu.
“Ida-ne’e hanesan resureisaun ida-ne’ebé estrenu. Hein katak artista timoroan sei kontinua lori knananuk tradisionál ‘Tebe-Tebe’ nian hodi sai internasionál,” nia dehan.
Maske artista timoroan hala’o ona resurreisaun maibé daudaun ne’e ALMAMOR no grupu artista kontinua hasoru difikuldade sira iha termu falta transformasaun dijitál ne’ebé fasilita povu atu halo imitasaun ba knananuk sira sein husu lisensa husi hakerek-na’in.
Tanbe ne’e, nia parabeniza ba artista hotu ne’ebé hamutuk ho ALMAMOR selebra tinan 25 ezisténsia ALMAMOR nian iha Timor-Leste, hodi promove knananuk Timor-Leste nian ba mundu.
Diretór Promosaun, Arte no Kultura iha Sekretáriu Estadu Arte no Kultura (SEAK), Felix Ximenes, hateten oras ne’e daudaun SEAK servisu hamutuk ho grupu artista sira-ne’e hodi fó formasaun ba sira kona-ba formasaun múzika dijitál ne’e.
“Ita hakbiit sira ho fasilidade muzikál inklui atu sensibiliza lei direitu no propriedade iha orden ema seluk labele fó sai sira-nia knananuk. Marka prezensa iha komemorasaun ALMAMOR 25 anos ne’e mak grupu artista husi Cinco de Oriente, Vialma, grupu artista sira seluk, artista individual mak hanesan; Agustinho Moniz no sira seluk, hotu-hotu ALMAMOR nia bainaka estruturál no bainaka distintu sira seluk,” nia dehan.
Selebrasaun ba tinan 25 ALMAMOR nia ezisténsia iha Timor-Leste ne’ebé selebra iha Fundação Oriente, Bairo Formosa, Dili ho atividade oioin ne’ebé kompostu husi Talk Show, Workshop, Ezibisaun no divertimentu Muzikál ne’ebé aprezenta husi artista timoroan sira durante selebrasaun ne’e.
ALMAMOR eziste iha tinan 2000 no ohin loron atinje ona tinan 25 iha Timor-Leste, nu’udar sumbriña ba grupu artista hotu-hotu no artista individuál atu kontinua promove knananuk Timor-Leste nian iha nasionál no mós promove knananuk Timor-Leste ba mundu tomak.
Notísia Relevante: Filipus Nino Pereira eleitu sai Prezidente ALMAMOR ba períodu 2023-2028
Jornalista : Osória Marques
Editór : Cancio Ximenes
