OEKUSI, 05 Maiu 2025 (TATOLI) – Diresaun Rejionál Rejistu Sivíl no Konservatóriu Notariádu Rejiaun Administrativa Espesiál Oekusi Ambeno (RAEOA), segunda ohin, realiza teste ba sidadaun estranjeiru na’in-17 ne’ebé hakarak sai sidadaun Timor-Leste.
Responsavél Departementu Notariádu Oekusi, José Ase Neno Colo, esplika ba sidadaun na’in-17 oferese husi ekipa Insitutu Nasionál Linguístika (INL), tanba sidadaun na’in-17 ne’e kumpre ona rezekitu, tanba molok atu hetan ezame tenke iha dokumentu hanean sertidaun kazamentu hodi komprova katak ema ne’e kaben tinan lima kala’e no tenke hela iha Timor-Leste tinan rua tuituir malu no presiza hatene netik lian ofisiál ida.
Notísia relevante:Servisu Migrasaun deporta sidadaun estranjeira 124 viola vistu
“Ohin, sira na’in-17 de’it mak partisipa ezame sidadania, antes ne’e barak mak hatama pedidu atu partisipa mós ezame maibé presiza kompleta dokumentu, hanesan passaporte ho autorizasaun rezidénsia,” dehan José Neno, iha Oekusi, ohin.
Daudaun ne’e, nia relata parte notariádu distribui ona formulária ba xefe suku sira hotu, atu rekolla dadus iha kada suku, ne’ebé dadús provizória ne’ebé rejista ona kuaze 500 ona, maibé barak mak seidauk iha dokumentu hanesan pasaporte no autorizasaun rezidénsia no balun hatene lé no hakerek.
Iha fatin hanesan, Diretora Institutu Nasionál Linguístika (INL), Rosa da Costa, hatete kritériu importante mak tenke ko’alia lian ofisiál Timor-Leste nian hanesan Tetun no Portugés.
“Ami mai fó ezame de’it maibé preparasaun no prosesu tomak liuliu dokumentu sira ne’e husi Notariadu Oekusi, ami fó de’it ezame kona-ba lian liuliu lian nasionál Tetun no Portugés, atu fó teste ba sidadaun sira hatene lian pelu-menus hatene netik ida, pontu ezame sira ami labele ko’alia sai,” nia informa.
Entretantu, Kandidatu Sidadaun Timor-Leste, Yudith Anuno Siki, sente orgullu tanba hela iha Timor-Leste dezde 2010 to’o 2025 mak foin bele partisipa ezame atu sai sidadaun Timor-Leste.
“Ha’u sente kontente loos tanba ami hein tinan barak ona liuliu tratamentu sira kle’ur no ohin ami bele partisipa ezame ne’e. Tanba ha’u nia la’en husi Timor-Leste no hela iha Oekusi dezde 2010 to’o agora, ne’ebé ami mós kazamentu ona no dokumentu sira ami trata hotu ona,” nia orgullu.
Notísia relevante:MJ sertifika ema estranjeiru haat iha RAEOA sai sidadaun timor-oan
Jornalista: Abílio Elo Nini
Editór: Florencio Miranda Ximenes
